गंजल्या ओठांस माझ्या GANJALYA OTHAS MAZYA

गंजल्या ओठांस माझ्या धार वज्राची मिळू दे !

आंधळ्या आत्म्यात माझ्या सूर्य सत्याचा जळू दे !

पांगळा बंदिस्त माझा जन्म आकाशून जावो

वादळी आवेग माझा चार भिंतींना कळू दे !

सारखे सौंदर्य माझ्या कोरड्या गात्री खळाळो

सारखे अस्तित्व माझे पेटतांना दर्वळू दे !

लाभु दे लाचार छाया मोठमोठ्यांना परंतू

तापल्या मातीत माझा घाम मानाने गळू दे !

Lyrics - सुरेश भट SURESH BHAT
Music -पं. हृदयनाथ मंगेशकर PANDIT HRUDAYNATH MANGESHAKAR
Singer - रवींद्र साठे RAVINDR SATHE
Movie / Natak / Album -उंबरठा UMBARATHA

पाहिले वळून मला PAHILE VALUN MALA

कळे न काय कळे एवढे कळून मला
जगून मीच असा घेतसे छळून मला

तुरुंग हाच मला सांग तू कुठे नाही?
मिळेल काय असे दूरही पळून मला

पुसू कुणास कुठे राख राहिली माझी?
उगीच लोक खुळे पाहती जळून मला

खरेच सांग मला.. काय ही तुझीच फुले?
तुझा सुगंध कसा ये न आढळून मला?

जरी अजून तुझे कर्ज राहिले नाही
अजून घेत रहा जीवला पिळून मला

उजाडलेच कसे? ही उन्हे कशी आली?
करी अजून खुणा चंद्र मावळून मला

कधीच हाक तुझी हाय ऐकली नाही
अखेर मीच पुन्हा पाहिले वळून मला

Lyrics -सुरेश भट SURESH BHAT
Movie / Natak / AlbuM- गझल GAJAL

सुर मागु तुला मी कसा SUR MAGU TULA MI KASAA

सुर मागु तुला मी कसा
जीवना तूं तसा मी असा

तू मला मी तुला पाहिले
एकमेकास न्याहाळिले
दु:ख माझे तुझा आरसा  

एकदाही मनासारखा
तू न झालास माझा  सखा 
खेळलो ,खेळ झाला जसा


Lyrics -सुरेश भट SURESH BHAT
Music -हृदयनाथ मंगेशकर HRUDAYANATH MANGESHAKAR
Singer -अरुण दाते ARUN DATE

सूर मागू तुला मी कसा,Soor Magu Tula Mi Kasa

सूर मागू तुला मी कसा ?
जीवना तू तसा, मी असा !

तू मला, मी तुला पाहिले
एकमेकांस न्याहाळिले
दुःख माझातुझा आरसा !

एकदाही मनासारखा
तू न झालास माझा सखा
खेळलो खेळ झाला जसा !

खूप झाले तुझे बोलणे
खूप झाले तुझे कोपणे
मी तरीही जसाच्या तसा !

रंग सारे तुझे झेलुनी
शाप सारे तुझे घेउनी
हिंडतो मीच वेडपिसा !

काय मागून काही मिळे ?
का तुला गीत माझे कळे ?
व्यर्थ हा अमृताचा वसा !

सुन्यासुन्या मैफिलीत माझ्या,Sunya Sunya Maifilit Majhya

सुन्यासुन्या मैफिलीत माझ्या तुझेच मी गीत गात आहे
अजूनही वाटते मला की, अजूनही चांदरात आहे

कळे न मी पाहते कुणाला ? कळे न हा चेहरा कुणाचा ?
पुन्हा पुन्हा भास होत आहे तुझे हसू आरशात आहे !

सख्या तुला भेटतील माझे तुझ्या घरी सूर ओळखीचे
उभा तुझ्या अंगणी स्वरांचा अबोल हा पारिजात आहे !

उगीच स्वप्नात सावल्यांची कशास केलीस आर्जवे तू ?
दिलेस का प्रेम तू कुणाला तुझ्याच जे अंतरात आहे ?

सारेच हे उमाळे आधीच,Sarech He Umale Aadhich

सारेच हे उमाळे आधीच योजलेले
सारेच हे जिव्हाळे आधीच बेतलेले !

सांभाळतात सारे आपापली दुकाने;
माझेच हे दिवाळे काढून लोक गेले !

मी हा भिकारडा अन्‌ माझी भिकार दु:खे;
त्यांचे हुशार अश्रू आधीच गाजलेले !

माझी जगायची आहे कुठे तयारी ?
त्यांच्या नकोत युक्त्या जे जन्मताच मेले !

माझ्या शिळ्या भुकेची उष्टी कशास चर्चा ?
जे घालतात भिक्षा तेही उभे भुकेले !

आता कुणाकुणाचे मी घाव आठवावे ?
येतात जे दिलासे तेही उगाळलेले !

समजावुनी व्यथेला,Samajavuni Vyathela

समजावुनी व्यथेला समजावता न आले !
मज दोन आसवांना हुलकावता न आले !

सर एक श्रावणाची आली, निघून गेली
माझ्या मुक्या तृषेला पण बोलता न आले ?

चुकवूनही कसा हा चुकला न शब्द माझा
देणे मलाच माझे नाकारता न आले !

केले जरी खुलासे मीही नकोनकोसे,
जगणे अखेर माझे मज टाळता न आले !

सजण दारी उभा,Sajan Dari Ubha

सजण दारी उभा, काय आता करू ?
घर कधी आवरू ? मज कधी सावरू ?

मी न केली सखे, अजुन वेणीफणी,
मी न पुरते मला निरखिले दर्पणी
अन्‌ सडाही न मी टाकिला अंगणी
राहिले नाहणे ! कुठुन काजळ भरू ?

मी न दुबळी कुडी अजुन शृंगारिली
मी न सगळीच ही आसवे माळिली,
प्राणपूजा न मी अजुनही बांधिली;
काय दारातुनी परत मागे फिरू ?

बघ पुन्हा वाजली थाप दारावरी:
हीच मी ऐकिली जन्मजन्मांतरी;
तीच मी राधिका ! तोच हा श्रीहरी !
हृदय माझे कसे मीच हृदयी धरू ?

लाभले अम्हास भाग्य,Labhale Amhas Bhagya

लाभले अम्हास भाग्य बोलतो मराठी
जाहलो खरेच धन्य ऐकतो मराठी
धर्म, पंथ, जात एक जाणतो मराठी
एवढ्या जगात माय मानतो मराठी

आमुच्या मनामनात दंगते मराठी
आमुच्या रगारगात रंगते मराठी
आमुच्या उराउरात स्पंदते मराठी
आमुच्या नसानसात नाचते मराठी

आमुच्या पिलापिलात जन्मते मराठी
आमुच्या लहानग्यात रंगते मराठी
आमुच्या मुलामुलीत खेळते मराठी
आमुच्या घराघरात वाढते मराठी

आमुच्या कुलाकुलात नांदते मराठी
येथल्या फुलाफुलात हासते मराठी
येथल्या दिशादिशात दाटते मराठी
येथल्या नगानगात गर्जते मराठी

येथल्या दरीदरीत हिंडते मराठी
येथल्या वनावनात गुंजते मराठी
येथल्या तरुलतात साजते मराठी
येथल्या कळीकळीत लाजते मराठी

येथल्या नभामधून वर्षते मराठी
येथल्या पिकांमधून डोलते मराठी
येथल्या नद्यांमधून वाहते मराठी
येथल्या चराचरात राहते मराठी

रंगुनी रंगात साऱ्या,Ranguni Rangat Sarya

रंगुनी रंगात साऱ्या रंग माझा वेगळा !
गुंतुनी गुंत्यात साऱ्या पाय माझा मोकळा !

कोण जाणे कोठुनी ह्या सावल्या आल्या पुढे
मी असा की लागती ह्या सावल्यांच्याही झळा !

राहती माझ्यासवे ही आसवे गीतांपरी
हे कशाचे दुःख ज्याला लागला माझा लळा !

कोणत्या काळी कळेना मी जगाया लागलो
अन्‌ कुठे आयुष्य गेले कापुनी माझा गळा !

सांगती 'तात्पर्य' माझे सारख्या खोट्या दिशा
"चालणारा पांगळा अन्‌ पाहणारा आंधळा !"

माणसांच्या मध्यरात्री हिंडणारा सूर्य मी
माझियासाठी न माझा पेटण्याचा सोहळा !

रंग माझा तुला,Rang Majha Tula

रंग माझा तुला ! गंध माझा तुला !
बोल काहीतरी ! बोल माझ्या फुला !

सांग लाजूनही नाव आता तरी
एक खोळंबले गीत माझ्या उरी
अन्‌ वसंतास मी शब्द माझा दिला !

वेळ जादूभरी, ही गुलाबी हवा !
ही न मेंदी तुझी, रंग माझा नवा !
भास झाला खरा ! ध्यास माझा खुळा !

आज माझी-तुझी भेट झाली अशी
शीळ यावी पुढे चांदण्याची जशी
सांग, सोडू कसा हात हातातला !

राहिले रे अजून श्वास किती,Rahile Re Ajun Shvas Kiti

राहिले रे अजून श्वास किती
जीवना, ही तुझी मिजास किती

आजची रात्र खिन्न ताऱ्यांची
आजचा चंद्रही उदास किती

मी कसे शब्द थोपवू माझे ?
हिंडती सूर आसपास किती

दु:ख माझे... विरंगुळा त्यांचा
मी करावे खुळे कयास किती

ओळखीचे कुणीतरी गेले...
ओळखीचा इथे सुवास किती

हे कसे प्रेम? या कशा आशा ?
मी जपावे अजून भास किती ?

सोबतीला जरी तुझी छाया...
मी करू पांगळा प्रवास किती ?

येणारा दिवस मला,Yenara Divas Mala

येणारा दिवस मला हेटाळत हसणारच !
जाणारा दिवस मला जाताना डसणारच !

वरवरच्या बोलण्यात गेली बघ सरून रात
मावळता चंद्र मला नाव तुझे पुसणारच !

देताना हृदय तुला केला मी हा विचार
घेणारा घेणारच ! देणारा फसणारच !

हारूनही लाखवार माझी झाली न हार
मी माझ्या स्वप्नांना फिरफिरून पिसणारच !

माझे घर वाऱ्याचे अन्‌ पायच पाऱ्याचे
मी जगास रस्त्यावर गाताना दिसणारच !

काही भलतेच लोक तेव्हा करतील शोक
तेव्हाही मी त्यांच्या आसवांत नसणारच !

मेंदीच्या पानांवर,Mendichya Panavar

मेंदीच्या पानांवर मन अजून झुलते ग
जाईच्या पाकळ्यांस दंव अजून सलते ग

झुळझुळतो अंगणात तोच गार वारा ग
हुळहुळतो तुळशीचा अजुन देह सारा ग

अजुन तुझे हळदीचे अंग अंग पिवळे ग
अजुन तुझ्या डोळ्यांतिल मोठेपण कवळे ग

मी मज हरपुन बसले ग,Mi Maj Harpun Basale Ga

मी मज हरपुन बसले ग, सखि मी मज हरपुन बसले ग

आज पहाटे श्रीरंगाने मजला पुरते लुटले ग
साखरझोपेमध्येच अलगद प्राजक्तासम टिपले ग

त्या श्वासांनी दीपकळीगत पळभर मी थरथरले ग
त्या स्पर्शाच्या हिंदोळ्यावर लाजत उमलत झुलले ग

त्या नभश्यामल मिठीत नकळत बिजलीसम लखलखले ग
दिसला मग तो देवकिनंदन अन्‌ मी डोळे मिटले ग

मी एकटीच माझी असते,Mi Ekatich Majhi Asate

मी एकटीच माझी असते कधीकधी
गर्दीत भोवतीच्या नसते कधीकधी

येथे न ओळखीचे कोणीच राहिले
होतात भास मजला नुसते कधीकधी

जपते मनात माझ्या एकेक हुंदका
लपवीत आसवे मी हसते कधीकधी

मागेच मी कधीची हरपून बैसले
आता नकोनकोशी दिसते कधीकधी

जखमा बुजून गेल्या साऱ्या जुन्या तरी
उसवीत जीवनाला बसते कधीकधी

मालवून टाक दीप चेतवून,Malavun Tak Deep

मालवून टाक दीप चेतवून अंग-अंग !
राजसा किती दिसांत लाभला निवांत संग !

त्या तिथे फुलाफुलांत, पेंगते अजून रात
हाय तू करू नकोस एवढ्यात स्वप्नभंग !

गारगार या हवेत, घेउनी मला कवेत
मोकळे करून टाक एकवार अंतरंग !

दूरदूर तारकात बैसली पहाट न्हात
सावकाश घे टिपून एक एक रूपरंग !

हे तुला कसे कळेल ? कोण एकटे जळेल ?
सांग, का कधी खरेच एकटा जळे पतंग ?

काय हा तुझाच श्वास ? दर्वळे इथे सुवास !
बोलरे हळू उठेल चांदण्यावरी तरंग !

माझी उदास गीते तू,Majhi Udas Geete Tu

माझी उदास गीते तू ऐकतोस का रे ?
अन्‌ आसवांत माझ्या तू नाहतोस का रे ?

येताच तू समोरी मी दर्वळून जाते
माझ्यासमान तूही गंधाळतोस का रे ?

माझ्या मुक्या मनाच्या का छेडतोस तारा ?
माझ्यासवेच तूही झंकारतोस का रे ?

एकांत जीवनाचा अंधारला असू दे !
तू अंतरात माझ्या तेजाळतोस का रे ?

मागता न आले म्हणुनी,Magata Na Aale Mhanuni

मागता न आले म्हणुनी राहिलो भिकारी !
लागली न वर्णी माझी कोणत्याच दारी !

भाग्यवान लाचारांना दिसे मीच नंगा:
घेऊनी न झोळी आलो म्हणुन मी लफंगा !

तशी जरी दातारांची मानतो भलाई,
फाटक्या खिशाला माझ्या बोचते कमाई !

आसवांत माझी अर्धी भाकरी बुडाली;
सोसण्यात उरलीसुरली भूक शांत झाली !

मल्मली तारुण्य माझे तू,Malmali Tarunya Majhe

मल्मली तारुण्य माझे तू पहाटे पांघरावे !
मोकळ्या केसात माझ्या तू जीवाला गुंतवावे !

लागुनी थंडी गुलाबी शिर्शिरी यावी अशी, की
राजसा, माझ्यात तू अन्‌ मी तुझ्यामाजी भिनावे !

तापल्या माझ्या तनूची तार झंकारून जावी
रेशमी संगीत स्पर्शाचे पुन्हा तू पेटवावे !

रे ! तुला बाहूत माझ्या रूपगंधा जाग यावी
मी तुला जागे करावे ! तू मला बिलगून जावे !