वेगळ्या जगात या VEGALYA JAGAT YA

वेगळ्या जगात या अशी कशी दंगले
धुंद या स्वरात मी आज रंग-रंगले

वेगळ्या जगात या सूर आज रंगले
धुंद या स्वरात मन आज दंग-दंगले

भरारून झेप घेई पाखरू मनाचे
दाही दिशा मोकळ्या या बंध ना कुणाचे
स्वप्‍न आज प्रीतीचे लोचनांत जागले
धुंद या स्वरात मी आज रंग-रंगले

झाड-वेल-फूल-पाने कुजबुजू बोलती
तुझे-माझे गुपित हे कानामधी खोलती
एकांती संगतीचे वेड जणु लागले
धुंद या स्वरात मन आज दंग-दंगले

झोका घेई फांदीवर प्रीत माझी साजणा
मिठीमधे रेशमाच्या येशील का सांग ना?
स्पर्श हा नवानवा रोमरोम झिंगले
धुंद या स्वरात मी आज रंग-रंगले
धुंद या स्वरात मन आज दंग-दंगले

Lyrics -जगदीश खेबूडकर JAGADISH KHEBUDAKAR
Music -विश्वनाथ मोरे VISHVNATH MORE
Singer -आशा भोसले,सुरेश वाडकरAASHA BHOSALE,SURESH WADEKAR
Movie / Natak / Album -बंदिवान मी या संसारी BANDHIVAN MI YA SANSARI

स्वप्‍नात साजणा SWAPNAT SAJANA

स्वप्‍नात साजणा येशील का ?
चित्रात रंग हे भरशील का ?

मी जीवन गाणे गावे, तू स्वरांत चिंब भिजावे
दोघांनी हरवून जावे, ही किमया नकळत करशील का ?

ही धूंद प्रीतिची बाग, प्रणयाला आली जाग
रोमांचित गोरे अंग, विळख्यात रेशमी धरशील का ?

प्रतिमेचे चुंबन घेता, जणू स्वर्गच येई हाता
मधुमीलन होता होता, देहात भरून तू उरशील का ?



Lyrics -जगदीश खेबूडकर JAGADISH KHEBUDKAR
Music -विश्वनाथ मोरे VISHVNATH MORE
Singer -आशा भोसले AASHA BHOSALE
Movie / Natak / Album -गोंधळात गोंधळ GONDHALAT GONDHAL

अप्सरा स्वर्गातुन आली APASARA SWARATUN AALI

इंद्रधनूच्या कमानीतुनी अवतरली खाली
अप्सरा स्वर्गातुन आली

पदन्यास हे झंकाराचे
कोरिव लेणे शृंगाराचे
जणू सांज ही रविकिरणांच्या तेजाने न्हाली

जलवंतीच्या निळ्या दर्पणी
न्याहळसी का तनू देखणी ?
नजर बोलता लाज अशी का साज नवा ल्याली ?

अनेक रूपी, अनेक रंगी
भासलीस तू सखे शुभांगी
स्वप्‍नमयूरी आज प्रियाला साद जणू घाली

Lyrics -जगदीश खेबूडकर JAGADISH KHEBUDAKAR
Music -बाळ पळसुले BAL PALASULE
Singer -महेंद्र कपूर MAHENDR KAPOOR
Movie / Natak / Album - पाटलीण PATALIN

हसले फसले हरवून मला,Hasale Phasale Harvun Mala

हसले, फसले, हरवून मला मी बसले

कळी मी अबोल होते, वारा लबाड आला
मी अंग चोरीले ग, हळुवार स्पर्ष झाला
क्षण ते दंवात विझले

देठातुनी फुलावे, हितगूज एक ओले
कुजबूज पाकळ्यांची, गंधास रंग बोले
सारे मनात ठसले

वेलीवरी धुक्याचा, उठता नवा शहारा
स्वप्नात जागले मी, छेडीत चंद्र तारा
स्वर ते अबोध कसले

ओशाळल्या मनाला, जाणीव आज लाजे
मजला मिळून सारे, काही न आज माझे
म्हणुनी उगाच रुसले

हवास तू हवास तू,Havas Tu Havas Tu

हवास तू, हवास तू, हवास मज तू, हवास तू
प्रिया नाचते आनंदाने दूर उभा का उदास तू ?

मदनासम हे रूप देखणे, शब्दाविण हे मुक्त बोलणे
तुझ्यापुढे मज गगन ठेंगणे, ज्योती मी अन्‌ प्रकाश तू

या तेजस्वी डोळ्यांमधुनी, भरदिवसा हो रात चांदणी
मुखचंद्राच्या कलाकलांनी, हासविणारा सुहास तू

तारुण्याच्या झाडावरती, मोहक हो‍उनी बसली प्रीती
या प्रीतीच्या पूर्तीसाठी, करशील का रे प्रयास तू

हलके हलके जोजवा,Halake Halake Jojava

हलके हलके जोजवा, बाळाचा पाळणा
पाळण्याच्या मधोमध फिरतो खेळणा

सजली ग मऊ मऊ मखमालीची शैय्या
निजली ग बाळाची गोरी गोरी काया
बाळ रुपडे देवाचे, भुलविते लोचना

खेळवा लाडानं गोपा बायांनो
गोविंद घ्या, गोपाळ घ्या, म्हणा सयांनो
नाव ठेवा नवसाचा, हा राजा देखणा

कुर्रर्र करा कानात हळूच भेटा ग
बारशाचा सोहळा घुगऱ्या वाटा ग
आज बाई इंद्राचा दरबार ठेंगणा

स्वप्नांत रंगले मी,Swapnat Rangale Mi

स्वप्नांत रंगले मी, चित्रात दंगले मी
सत्यातल्या जगी या झोपेत जागले मी

हे वेड प्रेमिकांचे गीतात गाइले मी
हे गीत भावनेचे डोळ्यांत पाहिले मी

या वृक्षवल्लरींना ही ओढ मीलनाची
पाहून जाणिली मी भाषा मुकेपणाची
माझ्या प्रियापुढे का लाजून राहिले मी

एकांत हा क्षणाचा भासे मुहूर्तवेळा
या नील मंडपात जमला निसर्गमेळा
मिळवून शब्द सूर, हे हार गुंफिले मी

घेशील का सख्या तू हातात हात माझा ?
हळव्या स्वयंवराला साक्षी वसंत राजा
या जन्मसोबतीला सर्वस्व वाहिले मी

स्वप्नात साजणा येशील का,Swapnat Sajana Yeshil Ka

स्वप्नात साजणा येशील का ?
चित्रात रंग हे भरशील का ?

मी जीवन गाणे गावे, तू स्वरात चिंब भिजावे
दोघांनी हरवून जावे, ही किमया नकळत करशील का ?

ही धूंद प्रीतीची बाग, प्रणयाला आली जाग
रोमांचित गोरे अंग, विळख्यात रेशमी धरशील का ?

प्रतिमेचे चुंबन घेता, जणू स्वर्गच येई हाता
मधुमीलन होता होता, देहात भरून तू उरशील का ?

सुंबरान गावू चला,Sumbaran Gavu Chala

सुंबरान गावू चला सुंबरान गावू रे
या शेकोटीच्या उबिला गा रातभर ऱ्हाऊ रे

भल्याभल्यास्नी सोसंना ही जवानीची आग
काय करामत सांगू हिची लई न्यारी धग
ऋषीमुनी बी पोळलं असा इश्कबाजीचा संग
भली भली भुलली गा कथा त्याची लावू रे
(बिरोबाच्या नावानं चांगभलं)
सुंबरान गावू चला सुंबरान गावू रे
या शेकोटीच्या उबिला गा रातभर ऱ्हाऊ रे

विश्वामित्र बसला व्हता भगवंताच्या जपाला
डोळं मिटून ध्यान लावं रानावनात तपाला
आली मेनका नाचत तिच्या भुलला रूपाला भुलला रूपाला
तवाच्या गा येळेचा ह्यो पडताळा दावू रे
(बिरोबाच्या नावानं चांगभलं)
सुंबरान गावू चला सुंबरान गावू रे
या शेकोटीच्या उबिला गा रातभर ऱ्हाऊ रे

गौतम ऋषीची होती अहिल्या बाईल
राजा इन्द्रानी तिला डोळं भरून पाहिलं
पतिरूप घेऊन तिला एकांती त्यानं भोगलं त्यानं भोगलं
मोठंपणा घसरला याद त्याची ठेवू रे
(बिरोबाच्या नावानं चांगभलं)
सुंबरान गावू चला सुंबरान गावू रे
या शेकोटीच्या उबिला गा रातभर ऱ्हाऊ रे

असा व्हता पराशर मुनी त्याला दिसली मत्स्यगंधा
साधुपणाला झाली गा तिथं कशी मदनाची बाधा
तिला भिजली बगुन तिच्या लागला की नादा लागला की नादा
किती किती उदारणं सांगा अशी देवू रे
(बिरोबाच्या नावानं चांगभलं)
सुंबरान गावू चला सुंबरान गावू रे
या शेकोटीच्या उबिला गा रातभर ऱ्हाऊ रे

नर-नारीची घातली अशी जल्माची गाठ
किसनदेवाच्या बायका सोळा हजार एकशे आठ
तिच्या शिणगाराचा छंद उभ्या दुनियेला पाठ दुनियेला पाठ
पुराणाचा दाखला ह्यो कलियुगी घेऊ रे
(बिरोबाच्या नावानं चांगभलं)
सुंबरान गावू चला सुंबरान गावू रे
या शेकोटीच्या उबिला गा रातभर ऱ्हाऊ रे

सांभाळ दौलत सांभाळ,Sambhal Dauat Sambhal

येड्या मानसा जपून चाल, देव सांगतो सांज सकाळ
सांभाळ दौलत सांभाळ अरं ही दौलत सांभाळ

ह्यो यज्ञ मांडला कर्मा संगती धर्माचा ..... ह्यो धर्माचा
ह्यो वारा गातोय मंतर हरीच्या नामाचा ..... ह्यो नामाचा
कुणी राकुस येता बाण सुटावा रामाचा ..... हो रामाचा
पाप मरावं पुण्य उरावं दुनिया ऱ्हाईल खुशाल
सांभाळ दौलत सांभाळ अरं ही दौलत सांभाळ

ह्ये माणिक मोती तालावरती डुलत्यात ..... आहा
ह्ये रान पाचूचं बघून डोळं दिपत्यात ..... आहा
ही आतुर झाली पिकं, जाऊ द्या पोटात भुकेल्या पोटात
त्यागावरती सारी जगतील अन्नब्रम्हाची कमाल
सांभाळ दौलत सांभाळ अरं ही दौलत सांभाळ

पानी सुटंल तोंडाला भूमी होईल अनावर ..... बा अनावर
ही बाग देवाची, तुडवा करतिल जनावरं ..... का जनावरं
जीव जगण्यापायी जल्म घेतो जगावर
माया द्यावी ममता घ्यावी सुखाचा होईल सुकाळ
सांभाळ दौलत सांभाळ अरं ही दौलत सांभाळ

सांग सखे मी चोर कसा,Sang Sakhe Mi Chor Kasa

सांग सखे मी चोर कसा
नटखट तू चितचोर असा

ही चोरी, बळजोरी, या प्रीतिच्या थापा रे
समजू नको, उमजू नको, खेळ नसे हा सोपा रे
घालुनी बेड्या, नेतील वेड्या, जन्मभरी तू कैदी जसा

बेहोषी, मदहोशी, हिरव्या हिरव्या किमयेची
यौवन हे, मधुवन हे, पर्वा ना मज दुनियेची
या एकांती, वनी दिनांती, प्रणयासाठी जीव पिसा

रंगत ही, संगत ही, या कैदेची और मजा
हात धरू, साथ करू, दोघे भोगू एक सजा
या भेटीचा, दिठीमिठीचा, हृदयांवरती गोड ठसा

संसार हा सुखाचा,Sansar Ha Sukhacha

संसार हा सुखाचा, मी अमृतात न्हाते
माझ्या मनात कोणी, अंगाई गीत गाते

तू देवरूप माझे मी एकरूप झाले
हिंदोळते उरी मी मन मोहरून आले
वात्सल्य आणि प्रीति जुळले नवीन नाते

वेलीवरी कळीचे झाले फुलून फूल
येता सुगंध वारा पडली तिलाच भूल
दारातल्या तरूला फळरूप आज येते

या भावरम्य लाटा हा सागरी किनारा
होता तसाच आहे हा आसमंत सारा
मज वेगळेपणाचे अपरूप आज वाटे

संसार मांडते मी,Sansar Mandate Mi

माझ्या मनी प्रियाची मी तार छेडिते
संसार मांडते मी, संसार मांडते !

दारी-घरी सुखाची रूपे उभी नटून
मी पाहते तयांना ही लोचने मिटून
माझ्याच सावलीला मी जवळ ओढते !

नाथा तुझी करावी सेवा अनन्यभावे
हळुवार स्पर्श होता वेलीस फूल यावे
लडिवाळ राजसाची मी दृष्ट काढते !

हातात आज माझ्या सौभाग्यदान आले
ठेवू कशी कुठे ग मी बावरून गेले
माझ्या खुळ्या सुखाला मी आज भेटते !

संसार-मंदिरी या आता,Sansar Mandiri Ya Aata

संसार-मंदिरी या आता उणे न काही
आनंद नाचतो ग आनंद गीत गाई

झाले सुवासिनी मी हातात राज्य आले
गृहिणीपदावरी मी साऱ्या सुखात न्हाले
ही ठेव वैभवाची नांदे दिशांत दाही

या श्याम-मंजिरीचा वृंदावनी पिसारा
दारात कर्दळीला झुलवी सुगंध वारा
हे झाड अंगणी या रखवालदार राही

पतिरूप देवा माझा सिंहासनी विराजे
गालात हासते मी डोळ्यांत प्रीत लाजे
भाग्यास आज माझ्या उपमा सुचे न काही

सोळावं वरीस धोक्याचं,Solava Varis Dhokyacha

तरुणपणाच्या रस्त्यावरचं पहिलं ठिकाण नाक्याचं
अन्‌ सोळावं वरीस धोक्याचं ग सोळावं वरीस धोक्याचं

पिसाट वारा मदनाचा, पतंग उडवी पदराचा
तोल सुटावा अशी वेळ ही, तरी चालणं ठेक्याचं

रात रुपेरी फुलली ग, मला पौर्णिमा भुलली ग
अंगावरती सांडु लागलं, टिपूर चांदणं रूप्याचं

ओढ लागली संगतीची, नजरभेटिच्या गमतीची
आज मला हे गुपीत कळलं, जत्रेमधल्या धक्क्याचं

सावधान होई वेड्या,Savadhan Hoi Vedya

साधु संत सांगून गेले, त्याचा बोध घेई
सावधान होई वेड्या, सावधान होई

सोने आणि रुपे, अम्हा मृत्तीकेसमान
तुकाराम बोले, त्याची मनी ठेव जाण
सुखाची ही पायवाट, काट्यांतून जाई

मना सज्जनांच्या संगे, धरी भक्तिपंथ
रामदास बोले त्याची मनी धरी खंत
आभाळाच्या डोळा सारे, खेळ तुझा पाही

रोज मानवाची हत्या, रोज वाटमारी
पापामधी झालं नाही, कुणी वाटेकरी
वाल्या कोळी नारदाच्या, लीन झाला पायी

सत्यम्‌ शिवम्‌ सुंदरा,Satyam Shivam Sundara

नमस्कार माझा या ज्ञानमंदिरा
सत्यम्‌ शिवम्‌ सुंदरा

शब्दरूप शक्ती दे
भावरूप भक्ती दे
प्रगतीचे पंख दे चिमणपाखरा

विद्याधन दे अम्हास
एक छंद, एक ध्यास
नाव नेई पैलतिरी, दयासागरा

हो‍उ आम्हि नीतिमंत
कलागुणी बुद्धिमंत
किर्तीचा कळस जाय उंच अंबरा

सत्य शिवाहुन सुंदर हे,Satya Shivahun Sundar He

दान दिल्याने ज्ञान वाढते, त्या ज्ञानाचे मंदिर हे
सत्य शिवाहुन सुंदर हे

इथे मोल ना दामाचे, मोती होतिल घामाचे
सरस्वतीच्या प्रेमाचे, प्रतीक रम्य शुभंकर हे

चिरा-चिरा हा घडवावा, कळस कीर्तीचा चढवावा
अज्ञानी तो पढवावा, थेंब अम्ही तर सागर हे

त्यागाला या नाव नसे, पुण्यवान हा देश असे
कल्पतरू हा उभा दिसे, त्या छायेतील मंदिर हे

सजणी ग भुललो मी,Sajani Ga Bholalo Mi

सजणी ग, भुललो मी काय जादू झाली
बगून तुला जीव माझा होई वर खाली

सजणा रं काय सांगू कुणी जादू केली
लाज मला आली बाई लाज मला आली

काल मला ह्याची बाई जाण नव्हती
आज कशी मोहरून आली नवती

अंग चोरतीया कशी लाजाळूची येली
अल्लड चाळ्याची खोडी कुठं गेली
लाज मला आली बाई लाज मला आली

लपं ना ही हुरहुर आज पदरी
शालू चोळी नेसूनी मी झाले नवरी

काया जणू गरतीचं लेणं आज ल्याली
येशील का घरी तू लक्ष्मीच्या चाली
लाज मला आली बाई लाज मला आली

सख्या हो आज मला सावरा,Sakhya Ho Aaj Mala Savara

मर्जी तुमची मी सांभाळीन, हृदयी द्या आसरा
सख्या हो, आज मला सावरा !

स्वप्नांचा हा मंचक सजला
धुंद सुगंधी होऊन भिजला
राहू कशी मी दूर साजणा
जवळी घ्या ना जरा
सख्या हो, आज मला सावरा !

हळू जरासा घाला विळखा
जीव होऊ दे हलका हलका
गोड गुलाबी उठता काटा
मोहरले दिलवरा
सख्या हो, आज मला सावरा !

चालू कशी मी बोलू कशी
मनातले मन खोलू कशी
मुकी असूनही गाते गाणे
माझ्या गुलमोहरा
सख्या हो, आज मला सावरा !