रामाचें भजन तेंचि,Ramache Bhajan Techi

रामाचें भजन तेंचि माझें ध्यान ।
तेणें समाधान पावईन ॥१॥

रामासी वर्णितां देहीं विदेहता ।
जाली तन्मयता सहजचि ॥२॥

राघवाचें रूप तें माझें स्वरूप ।
तेणें सुखरूप निरंतर ॥३॥

रामदास म्हणें मज एणें गती ।
राम सीतापतीचेनि नामें ॥४॥

ध्यान करु जाता मन,Dhyan Karu Jata Man

ध्यान करु जाता मन हरपले ।
सगूण ते झाले गुणातीत ॥१॥

जेथे पाहे तेथे राघवाचे ध्यान ।
करी चापबाण शोभतसे ॥२॥

राम माझे मनी राम माझे ध्यानी
शोभे सिंव्हासनी राम माझा ॥३॥


रामदास म्हणे विश्रांती मागणे
जीवीचे सांगणे हीतगूज ॥४॥

आरंभी वंदीन अयोध्येचा, Aarambhi Vandani Aayodhecha

आरंभी वंदीन अयोध्येचा राजा ।
भक्ताचीया काजा पावत असे ॥१॥

पावत असे महासंकटी निर्वाणी ।

रामनाम वाणी उच्चारीत ॥२॥

उच्चारिता राम होय पाप चर ।
पुण्याचा निश्चय पुण्यभूमी ॥३॥


पुण्यभूमी पुण्यवंतासीं आठवे ।
पापीयानाठवे काही केल्या ॥४॥

काही केल्या तुझे मन पालटेना ।

दास म्हणे जन सावधान ॥५॥

आनंदवनभुवनी, AanandvanBhuvani

स्वर्गीची लोटली जेथे
रामगंगा महानदी
तीर्थासी तुळणा नाही, आनंदवनभुवनी

त्रैलोक्य चालिल्या फौजा

सौख्य बंधविमोचने
मोहिम मांडली मोठी, आनंदवनभुवनी

येथून वाढला धर्मु
रमाधर्म समागमें
संतोष मांडला मोठा, आनंदवनभुवनी

भक्तांसी रक्षिले मागे
आताही रक्षिते पहा
भक्तांसी दिधले सर्वे, आनंदवनभुवनी

येथूनी वाचती सर्वे
ते ते सर्वत्र देखती
सामर्थ्य काय बोलावे, आनंदवनभुवनी


उदंड जाहले पाणी
स्नानसंध्या करावया
जप तप अनुष्ठाने, आनंदवनभुवनी

बुडाली सर्व ही पापे

हिंदुस्थान बळावले
अभक्तांचा क्षयो झाला, आनंदवनभुवनी