सोयरा सुखाचा विसावा SOYARA SUKHACHA VISAWA

सोयरा सुखाचा विसावा भक्तांचा ।
विठोबा निजाचा मायबाप ॥१॥

कृपाळू दीनांचा पळिभर न माझा ।
तोडर ब्रीदाचा साजे तया ॥२॥

काया-मनें-वाचा संग करा त्याचा ।
अनंत जन्मांचा हरेल शीण ॥३॥

नामा म्हणे आम्हां दीनांचे माहेर ।
हरी निरंतर ना विसंबे ॥४॥


Lyrics -संत नामदेव संत NAMADEV
Music -किशोरी आमोणकर KISHORI AAMONA
Singer -किशोरी आमोणकर  KISHORI AAMONA
Movie / Natak / Album -भक्तिगीत  BHAKTIGEET

सुखाचें हे सुख श्रीहरी,Sukhache He Sukh Shri

सुखाचें हे सुख श्रीहरी मुख ।
पाहतांही भूक तहान गेली ॥१॥

भेटली भेटली विठाई माऊली ।
वासना निवाली जिवांतील ॥२॥

चंद्रासी चकोर मेघासी मयूर ।
वाटे तैसा भर आनंदाचा ॥३॥

नामा म्हणे पाप आणि ताप दुख: गेले ।
जाहलें हें सुख बोलवेना ॥४॥

वैष्णवां घरीं सर्वकाळ,Vaishnava Ghari

वैष्णवां घरीं सर्वकाळ ।
सदा झणझणिती टाळ ॥१॥

कण्या भाकरीचें खाणें ।
गांठी रामनाम नाणें ॥२॥

बैसावयासी कांबळा ।
द्वारी तुळसी रंगमाळा ॥३॥

घरीं दुभे कामधेनु ।
तुपावरी तुळसी पानु ॥४॥

फराळासी पीठ लाह्या ।
घडी घडी पडती पायां ॥५॥

नामा म्हणे नेणती कांहीं ।
चित्त अखंड विठ्ठलापायीं ॥६॥

विठ्ठल आवडी प्रेमभावो,Vitthal Aavadi Prembhavo

विठ्ठल आवडी प्रेमभावो ।
विठ्ठल नामाचा रे टाहो ॥१॥

तुटला हा संदेहो ।
भवमूळ व्याधीचा ॥२॥

म्हणा नरहरी उच्चार ।
कृष्ण हरी श्रीधर ।
हेची नाम आम्हा सार ।
संसार करावया प्रेमभावो ॥३॥

नेणो नामाविण काही ।
विठ्ठल कृष्ण लवलाही ।
नामा म्हणे तरलो पाही ।
विठ्ठल विठ्ठल म्हणताची ॥३॥

रुपे श्यामसुंदर निलोत्पल,Rupe ShyamSundar Nilotpal

रुपे श्यामसुंदर निलोत्पल गाभा ।
सखीये स्वप्नी शोभा देखियेला ॥१॥

शंखचक्र गदा शोभती चहुकरी ।
सखीये गरुडावरी देखियेला ॥२॥

पितांबर कटी दिव्य चंदन उटी ।
सखीये जगजेठी देखियेला ॥३॥

विचारता मानसी नये जो व्यक्तीसी ।
नामा केशवेसी लुब्धोनी गेला ॥४॥

माझा भाव तुझे चरणी,Majha Bhaav Tujhe Charani

माझा भाव तुझे चरणी ।
तुझे रूप माझे नयनी ॥१॥

सापडलो एकामेका ।
जन्मोजन्मी नोहे सुटका ॥२॥

त्वा मोडिली माझी माया ।
मी तो जडलो तुझिया पाया ॥३॥

त्वा मज मोकलिले विदेही ।
मी तुज घातले हृदयी ॥४॥

नामा म्हणे गा सुजाणा ।
सांग कोणे ठकविले कोणा ? ॥५॥

प्रेमपिसें भरलें अंगीं,Prem Pise Bharale

प्रेमपिसें भरलें अंगीं ।
गीतेसंगें नाचों रंगीं ॥१॥

कोणे वेळे काय गाणें ।
हे तों भगवंता मी नेंणे ॥२॥

वारा धावे भलतया ।
तैसें माझी रंग छाया ॥३॥

टाळमृदंग दक्षिणेकडे ।
आम्ही गातो पश्चिमेकडे ॥४॥

बोले बाळक बोबडे ।
तरी ते जननीये आवडे ॥५॥

नामा म्हणे गा केशवा ।
जन्मोजन्मीं देईं सेवा ॥६॥

पंढरीचा वास चंद्रभागे,Pandharicha Vaas

पंढरीचा वास, चंद्रभागे स्नान ।
आणिक दर्शन विठोबाचे ॥१॥

हेची घडो मज जन्मजन्मांतरी ।
मागणे श्रीहरी नाही दुजे ॥२॥

मुखी नाम सदा संतांचे दर्शन ।
जनी जनार्दन ऐसा भाव ॥३॥

नामा म्हणे तुझे नित्य महाद्वारी ।
कीर्तन गजरी सप्रेमाचे ॥४॥

पंढरी निवासा सख्या,Pandhari Nivasa Sakhya

पंढरी निवासा सख्या पांडुरंगा ।
करी अंग संगा, भक्ताचिया ॥१॥

भक्त कैवारीया होसी नारायणा ।

बोलता वचन काय लाज ॥२॥

मागे बहुतांचे फेडियले ऋण ।
आम्हासाठी कोण आली धाड ॥३॥


वारंवार तुज लाज नाही देवा ।
बोल रे केशवा म्हणे नामा ॥४॥

पक्षिणी प्रभाति चारियासी,Pakshini Prabhati Chariyasi

पक्षिणी प्रभाति चारियासी जाये ।
पिलुवाट पाहे उपवासी ॥१॥

तैसे माझे मन धरी वो तुझी आस ।

चरण रात्रंदिवस चिंतितसे ॥२॥

तान्हे वस्त्र घरी बांधिलेस देवा ।
तया हृदयी ठावा माऊलीचा ॥३॥


नामा म्हणे देवा तू माझा सोयरा ।
झणि मज अव्हेरा अनाथ नाथा ॥४॥

नामाचा गजर गर्जे,Namacha Gajar Garje

नामाचा गजर गर्जे भीमातीर ।
महीमा साजे थोर तुज एका ॥१॥

ऋद्धी-सिद्धी दासी अंगण झाडीती ।

उच्छिष्ठे काढीती मुक्ती चारी ॥२॥

चारी वेद भाट होऊनी गर्जती ।
सनकादिक गाती कीर्ती तुझी ॥३॥


सुरवरांचे भार अंगणी लोळती ।
चरणरज क्षिती शिव वंदी ॥४॥

नामा म्हणे देव ऐसा हो कृपाळू ।

करितो सांभाळु अनाथांचा ॥५॥

देह जावो अथवा राहो,Deh Javo Athava Raho

देह जावो अथवा राहो । पांडुरंगी दृढ भावो ॥१॥

चरण न सोडी सर्वथा । आण तुझी पंढरीनाथा ॥२॥

वदनीं तुझे मंगलनाम । हृदयी अखंडित प्रेम ॥३॥

नामा म्हणे केशवराजा । केला पण हा चालवी माझा ॥४॥

तीर्थ विठ्ठल क्षेत्र विठ्ठल,Tirtha Vitthal Kshetra Vitthal

तीर्थ विठ्ठल, क्षेत्र विठ्ठल ।
देव विठ्ठल, देवपूजा विठ्ठल ॥१॥

माता विठ्ठल, पिता विठ्ठल ।
बंधु विठ्ठल, गोत्र विठ्ठल ॥२॥

गुरू विठ्ठल, गुरुदेवता विठ्ठल ।
निधान विठ्ठल, निरंतर विठ्ठल ॥३॥

नामा म्हणे मज विठ्ठल सापडला ।
म्हणुनि कळिकाळा पाड नाही ॥४॥

चक्रवाक पक्षी वियोगें,Chakravak Pakshi Viyoge

चक्रवाक पक्षी वियोगें बहाती ।
झालें मजप्रति तैसें आतां ॥१॥

चुकलीया माय बालकें रडती ।
झालें मजप्रति तैसें आतां ॥२॥

वत्स न देखतां गाई हंबरती ॥
झालें मजप्रती तैसें आतां ॥३॥

जीवनावेगळे मत्स्य तळमळती ।
झालें मजप्रति तैसें आतां ॥४॥

नामा म्हणे मज ऐसें वाटे चित्तीं ।

करितसे खंती फार तूझी ॥५॥

कुत्‍ना थमाल ले थमाल,Kutna Thamal Le Thamal

कुत्‍ना थमाल ले थमाल आपुल्या गाई ।
आम्ही आपुल्या घलासि जातो भाई ॥१॥

तुम्ही थोलल्या पातलाचे लेक ।
तुम्हांमधले मी गलीब आहे एक ।
मदला म्हणतां ले जाई गाई लाख ।
किती मी धावूं ले कातां लागला पायी ॥२॥

काली पिवली ले गाय आहे तान्हेली ।
या या गवल्याची धवली गाय पलाली ।

मदला देखुनी तो गवली हाका माली ।
काली कांबली हिलुनि घेतली थाली ॥३॥

काल बलाचि ले बलाचि खलवस केला ।
तुम्ही सल्वांनी फाल फाल घेतला ।
मी गलीब ले म्हणूनी थोलका दिला ।
तू म्हनसिल ले याला कलतीच नाही ॥४॥

कुत्‍ना म्हणे ले 'उगा राहि बोबड्या गा' ।
तुझ्या गायी ले मीच वळवितो गड्या ।
नाहितल धाडिन ले गोपालांच्या जोड्या ।
नामा म्हणे ले गोष्ट रोकडी पाही ॥५॥

काळ देहासी आला खाऊ,Kaal Dehasi Aala Khau

काळ देहासी आला खाऊ ।
आम्ही आनंदे नाचू गाऊ ॥१॥

कोणे वेळे काय गाणे ।
हे तो भगवंता मी नेणे ॥२॥

टाळ मृदुंग दक्षिणेकडे ।
माझे गाणे पश्चिमेकडे ॥३॥

नामा म्हणे बा केशवा ।
जन्मोजन्मी द्यावी सेवा ॥४॥

काय माझा आता,Kaay Majha Aata

काय माझा आता पाहतोसी अंत ।
येईं बा धांवत देवराया ॥१॥

माझ्या जीवा होय तुजविण आकांत ।

येईं बा धांवत देवराया ॥२॥

असे जरी काम भेटूनियां जात ।
येईं बा धांवत देवराया ॥३॥


येरे देवा आतां नामा तुज बाहात ।
येईं बा धांवत देवराया ॥४॥

अमृताहुनी गोड नाम,Amrutahuni God Naam

अमृताहुनी गोड नाम तुझे देवा ।
मन माझे केशवा का बा न घे ॥१॥

सांग पंढरीराया काय करु यांसी ।

का रूप ध्यानासी न ये तुझे ॥२॥

किर्तनी बैसता निद्रे नागविले ।
मन माझे गुंतले विषयसुखा ॥३॥


हरिदास गर्जती हरिनामाच्या किर्ती ।
नये माझ्या चित्ती नामा म्हणे ॥४॥

आधी रचिली पंढरी, Aadhi Rachali Pandhari

आधी रचिली पंढरी ।
मग वैकुंठ नगरी ॥१॥

जेव्हा नव्हते चराचर ।
तेव्हा होते पंढरपूर ॥२॥


जेव्हा नव्हती गोदा गंगा ।
तेव्हा होती चंद्रभागा ॥३॥

चंद्रभागेचे तटी ।
धन्य पंढरी गोमटी ॥४॥

नासिलीया भूमंडळ ।
उरे पंढरीमंडळ ॥५॥

असे सुदर्शनावरी ।
म्हणुनी अविनाशी पंढरी ॥६॥

नामा म्हणे बा श्रीहरी ।
आम्ही नाचु पंढरपुरी ॥७॥