गृहस्थाच्या अंगणात,Gruhasthachya Anganat

गृहस्थाच्या अंगणात हवे तुळशीचे रोप
पाय ठेविता पापाचा तिथे होई थरकाप

तुळशी गं माझे आई तूच आमुची पुण्याई
पूजा तुझी केल्याविण अन्न मुखी घालु नाही

तुळशीच्या आसपास कोटी देवतांचा वास
वारंवार नमस्कार, माझा तुळशी मातेस

गोंडा फुटला दिसाचा,Gonda Phutala Disacha

गोंडा फुटला दिसाचा जसं जास्वंदीचं फूल
माय धरित्रीच्या दारी पडे देवाचं पाऊल

माय माय म्हणताना सय माउलीची आली
माउलीच्या मागं मला, दादा, तुझीच साउली
देह नांदतो सासरी मन माहेरा निघालं
माय धरित्रीच्या दारी पडे देवाचं पाऊल

भाऊ माझा तालेवार बारा बैल दावणीला
उभा पाठीशी सावळा, काय उणं बहिणीला ?

साऱ्या गावाहून चढं असं धनंतर कुळ
माय धरित्रीच्या दारी पडे देवाचं पाऊल

माझं मागणं ते किती, तुझं देणं भारंभार
माझी चोळीची रे आशा, तुझा जरीचा पदर
झोपडीला या आधार, दादा, तुझं रे राऊळ
माय धरित्रीच्या दारी पडे देवाचं पाऊल

गंध हा श्वास हा,Gandha Ha Shwas Ha

गंध हा, श्वास हा, स्पर्श हा सांगतो
तूच तो, तूच तो, तूच तो !

हे धुंद डोळे नशिले नशिले
मला वेड यांनिच रे लाविले
हे ओठ राजा रसिले रसिले
स्वप्नात रे मीच ओलावले
हे ओळखिचे तुझे हासणे
माझी मला खूण आता कळे
या मनी जो कुणी दिलरूबा छेडितो
तूच तो, तूच तो, तूच तो !

ये राजसा हा दुरावा कशाला
घडी मीलनाची उभी राहिली
या झिंगलेल्या गुलाबी निशेची
किती काळ रे वाट मी पाहिली
कितीही लपविले खरे रूप तू
मी जाणिले कोण आहेस तू
बहुरूपी जो कुणी खेळ हा खेळतो
तूच तो, तूच तो, तूच तो !

गंध फुलांचा गेला,Gandha Phulancha Gela

गंध फुलांचा गेला सांगून
तुझे नि माझे व्हावे मिलन, व्हावे मीलन

सहज एकदा जाता जाता मिळुनि हसल्या अपुल्या नजरा
दो हृदयांच्या रेशीमगाठी प्रीत भावना गेली बांधून

विरह संपता, मिलनाची अमृतगोडी चाखीत असता
सखया अवचित जवळी येता ढळे पापणी, गेले लाजून

मनामनांच्या हर्षकळ्यांची आज गुलाबी फुले जाहली
वरमाला ही त्याच फुलांची गुंफून सखया तुलाच वाहीन

गुंतता हृदय हे,Guntata Hriday He

गुंतता हृदय हे कमलदलाच्या पाशी
हा प्रणयगंध परिमळे तुझ्या अंगाशी

या इथे जाहला संगम दो सरितांचा

प्राक्तनी आपुल्या योग तिथे प्रीतीचा
अद्वैत आपुले घडता या तीर्थाशी

दुर्दैवे आपण दुरावलो या देही
सहवास संपता, डागळले ऋण तेही
स्मर एकच तेव्हा सखये निज हृदयाशी

गंजल्या ओठास माझ्या धार,Ganjalya Othas Majhya Dhar

गंजल्या ओठास माझ्या धार वज्राची मिळू दे !
आंधळ्या आत्म्यात माझ्या सूर्य सत्याचा जळू दे !


पांगळा बंदिस्त माझा जन्म आकाशून जावो;
वादळी आवेग माझा चार भिंतींना कळू दे !

सारखे सौंदर्य माझ्या कोरड्या गात्री खळाळो;
सारखे अस्तित्व माझे पेटताना दर्वळू दे !

लाभु दे लाचार छाया मोठमोठ्यांना परंतू

तापल्या मातीत माझा घाम मानाने गळू दे !

आणु दे गा वंचकांना क्रूस छद्माचा दयाळा;
रक्त येशूचे परी डोळ्यांत माझ्या साकळू दे !

गंगा-जमुना दोघ्या,Ganga-Jamuna Doghya

गंगा-जमुना दोघ्या बयनी गो पानी झुलझुल व्हाय
दर्या किनारी एक बंगला गो पानी जाय-जुई-जाय

माशांनी मारलाय दनका गो पानी दलाला जाय
कोल्याची पोर एक सोबेची तया उबीच हाय
नेसली पैठण सारी गो पदर वाऱ्यानी जाय
अंगान्‌ चोली गझनिची पोरी ठुमकत जाय
नाखवा गेलाय्‌ डोलिला पोरी करशील काय

आंब्याच्या डांगलीवर बसलाय्‌ मोर, नवरीचा बापुस कवठं चोर
करवल्या खुइताना आंब्याच्या डांगल्या म्हायेरा जावालं सांजवलं

आंब्याची डांगली हलविली नवऱ्याने नवरीला पलविली

गंगा आली रे अंगणी,Ganga Aali Re Angani

गंगा आली रे अंगणी

बारा महिने तेरा काळ
रानोमाळी सुगी सुकाळ
चतुरपणाने करा गड्यांनो,

चतुरपणाने करा जळाच्या पाटाची आखणी

भूमिवरच्या भागीरथीला
स्वर्गंगेचा ओघ मिळाला
ऐसे महात्म्य गंगेचे
पाणी, पाणी, जिकडे-तिकडे, सौख्याची श्रावणी

सुंबरानं मांडिलं गा बिरूबा या देवाचं
आबाळाच्या पित्याचं गा धरीतरी मातेचं

पिकून पिवळी झाली घाटं
घुमवा भलरी भल्या पहाटं
भलरी भलरी भलरी दादा भलगडी दादा
करा कापणी, काढा दौलत, साधा ही पर्वणी

यंत्र चालवा गाळा ऊस
अमाप पिकला घ्या कापूस
वेचा कापूस वेचा ग वेचा कापूस वेचा
दूध विकाया पुन्हा निघाल्या, गोकुळच्या गौळणी

युग यंत्राचे आले रे, अवघड सोपे झाले रे
घाम न आता पडो कुणाचा, कोठे निष्कारणी

दळिद्र गेले पळुनि पार

फळाफुलांना आला बहार
नांदायाते येई लक्ष्मी, स्वर्गीची पाहुणी

गंगा आली, लक्ष्मी आली अंगणी

गौरीहरा दीनानाथा,Gaurihara Deenanatha

गौरीहरा दीनानाथा धरीन तुझे पाय
रुसू नको माझ्या देवा, तूच माझी माय

दयावंत तुजला म्हणती थोर थोर संत
एकरूप आपण दोघे, दूध आणि साय

तुला शोधुनिया देवा कैक लोक थकले
तुझ ठाव न कळे देवा करू तरी काय

गोष्ट मला सांग आई,Gosht Mala Sanga Aai

राजा राणीची नको, काऊ माऊची नको
गोष्ट मला सांग आई रामाची
वेळ आता झाली माझी झोपेची


राम हसायचा कसा, राम रडायचा कसा
आकाशीचा चांदोमामा मागायचा कसा
समजूत कोणी घातली त्या वेड्याची ?

राम काळा का गोरा, दिसत होता का बरा
मोठा भाऊ म्हणून त्याचा होता का तोरा
आवड होती का ग त्याला खेळाची ?

राम गेला का वनी, त्याला धाडीला कुणी
भिती नाही त्याच्या कशी आली ग मनी

सोबत तिथे त्याला होती का कोणाची

गोविंदा रे गोपाळा रे,Govinda Re Gopala Re

गोविंदा रे गोपाळा रे
छंद तुझा जडला, घननीळा

जगजेठी हा बनुनी गुराखी
पाठीवरती घोंगडी टाकी
यमुनातीराला नेतो कपिला असा हा हरी सावळा

व्याकूळ अंतर राहि निरंतर
नयनीचे नीर झरते झरझर

दर्शन दे रे आता मजला तुझ्या दासा नंदलाला

गोविंद गोविंद,Govind Govind

गोविंद गोविंद ।
मना लागलिया छंद ॥१॥

मग गोविंद ते काया ।
भेद नाही देवा तया ॥२॥


आनंदले मन ।
प्रेमें पाझरती लोचन ॥३॥

तुका म्हणे आळी ।
जेवी नुरे चि वेगळी ॥४॥

गोल तुझ्या शरीराचा,Gol Tujhya Shariracha

गोल तुझ्या शरीराचा डौल वर गोरा रंग नवती कवळी
वय नूतन हाती निऱ्या, चालणे चपळगती, नागीण पिवळी


अधरकुटी बत्तीस हिरकण्या एकावळी नग विराजती
ओठ शुद्ध पवळ्याचा रंग, लाजावी पाहून जावेळी ग ती

मंजूळ स्वर ऐकून कोकिळा वृत्ती बसुनी मनी गजबजती
जानु-जंघ सुकुमार पोटऱ्या अति नाजूक ग कर्दळी

गोऱ्या गोऱ्या टाचंत काटा,Gorya Gorya Tachat Kata

आडवाटेनं जाता जाता तोल माझा सुटला
गोऱ्या गोऱ्या टाचंत काटा रुतला

( सुया आना ग बिब्बं आना ग वाटून लावा झाडाला
हिच्या गोऱ्या टाचंत काटा रुतला )

सरसरून कळ ही आली
डोळं मिटलं नि बसले खाली
दात रोविता व्हटावरी मी घाम अंगी फुटला
गोऱ्या गोऱ्या टाचंत काटा रुतला

( अंगारा लावा कोंबडं कापा घेऊन या ग देवरुषाला
हिच्या गोऱ्या टाचंत काटा रुतला )

कुनी येऊन सावरा मला
काटा काढायची दावा कला
उसासा देता धागा चोळीचा नको तिथं तुटला
गोऱ्या गोऱ्या टाचंत काटा रुतला

( काटा बी न्हाई काहीच न्हाई नुसतीच आलीया लाडाला )
नाही माज्या टाचंत काटा रुतला

गोऱ्या गोऱ्या गालांवरी,Gorya Gorya Galavari

गोऱ्या गोऱ्या गालांवरी चढली लाजंची लाली गं पोरी नवरी आली
सनईच्या सुरांमंदी चौघडा बोलतो दारी गं पोरी नवरी आली
सजणी मैत्रीणी जमल्या अंगणी
चढली तोरणं मांडवदारी
किणकिण कांकणं रुणझुण पैंजणं
सजली नटली नवरी आली
गोऱ्या गोऱ्या गालांवरी चढली लाजंची लाली गं पोरी नवरी आली
सनईच्या सुरांमंदी चौघडा बोलतो दारी गं पोरी नवरी आली

नवऱ्या मुलाची आली हळद ही ओली
हळद ही ओली लावा नवरीच्या गाली
हळदीनं नवरीचं अंग माखवा
पिवळी करून तिला सासरी पाठवा
सजणी मैत्रीणी जमल्या अंगणी
चढली तोरणं मांडवदारी
सासरच्या ओढीनं ही हासते हळूच गाली ग पोरी नवरी आली
सनईच्या सुरांमंदी चौघडा बोलतो दारी ग पोरी नवरी आली

आला नवरदेव वेशीला, वेशीला ग, देव आला नारायण ग
मंडपात गणगोत सारं बैसलं ग पोरं-थोरं, ताशा वाजिलं

सासरी मिळू दे तुला माहेराची माया
माहेराच्या मायेसंगं सुखाची ग छाया

भरुनीया आलं डोळं जड जीव झाला
जड जीव झाला लेक जाय सासराला
किणकिण कांकणं रुणझुण पैंजणं

सजली नटली नवरी आली
आनंदाच्या सरी तुझ्या बरसु दे घरीदारी... ग पोरी सुखाच्या सरी...
सनईच्या सुरांमंदी चौघडा बोलतो दारी ग पोरी नवरी आली

गोरी बाहुली कुठुन आली,Gori Bahuli Kuthun Aali

गोरी बाहुली कुठुन आली
कुशीमध्ये आईच्या ही कशी शिरली
झगा ना साडी तश्शी नागडी
चड्डीदेखील कशी हिने नाही घातली

उताणी पडे तशीच रडे
डोळ्यांत हिच्या ओल्या निळ्याचे खडे
पुशी ही धीट गालीचे तीट
कुठे बाई ठेवावी ही जपूनी नीट

कोण्या दुकानी होती ही राणी
पेटीविना तरी हिला आणली कोणी
छान रेखिले नाक डोळुले
लावयाचे केस हिला पार राहिले
आई ग आई मला ही देई
बदल्यात माझी सारी खेळणी घेई


हत्ती नी घोडे, कुत्री, माकडे
सिनेमाची पेटीसुद्दा देईन गडे
पोर लाघवी मला ही हवी
हवीतर बाबांकडे माग तू नवी

गोरी गोरीपान फुलासारखी,Gori Goripan Phulasarakhi

गोरी गोरीपान, फुलासारखी छान
दादा, मला एक वहिनी आण

गोऱ्या गोऱ्या वहिनीची अंधाराची साडी

अंधाराच्या साडीवर चांदण्यांची खडी
चांदण्यांच्या पदराला बिजलीचा बाण !

वहिनीला आणायाला चांदोबाची गाडी

चांदोबाच्या गाडीला हरणांची जोडी
हरणांची गाडी तुडवी गुलाबाचे रान !

वहिनीशी गट्टि होता तुला दोन थापा

तुला दोन थापा, तिला साखरेचा पापा
बाहुल्यांच्या परी होऊ दोघी आम्ही सान !

गोमू संगतीनं माझ्या तू,Gomu Sangatina Majhya Tu

गोमू संगतीनं माझ्या तू येशील काय ?
माझ्या पिरतीची रानी तू होशील काय ?
आरं संगतीनं तुझ्या मी येणार नाय !
तुझ्या पिरतीची रानी मी होणार नाय !

ग तुझं टप्पोरं डोलं, जसं कोल्याचं जालं
माझं कालिज भोलं, त्याच मासोली झालं
माझ्या प्रीतीचा, सुटलाय तुफान वारा वारा वारा
रं नगं दावूस भलताच तोरा, जा रं गुमान साळसूद चोरा
तुझ्या नजरंच्या जादूला, अशी मी भुलणार नाय

रं माझ्या रूपाचा ऐना, तुझ्या जीवाची दैना
मी रे रानाची मैना, तुझा शिकारी बाणा
खुळा पारधी ग, जाळ्यामंदी आला आला आला
ग तुला रुप्याची नथ मी घालीन
ग तुला मिरवत मिरवत नेईन
तुज्या फसव्या या जाल्याला, अशी मी गावनार नाय

गोमू संगतीनं माझ्या तू येशील काय ?
आरं संगतीनं तुझ्या मी येणार ......हाय !
तुझ्या पिरतिचि रानी मी होनार हाय !

गोमू तुझे नादानं गो,Gomu Tujhe Nadana Go

गोमू तुझे नादानं गो नादानं गो नादानं बांधलाय्‌ बंगला
गोमू तू होशील का होशील का होशील काय गो नाखवीन


गल्यान्‌ची बोरमाल तुला मी करीन
पायांचे वाले तुला मी हाणीन
होशील का होशील का होशील गावची पाटलीन
गोमू तुझे नादानं गो नादानं गो नादानं बांधलाय्‌ बंगला

गोमू तुझे डोक्यानं गो ह्यो गजरा न्‌ पोरांच्या लागल्यान्‌ नजरा
गोमू आपले दोघांचा गो ह्यो जोरा न्‌ दिसेल सोबून बरा
माथ्यान्‌ जाईजुईचा ह्यो झेला, काय बोलतो ह्यो मेला
गोमू तुझे नादानं गो नादानं गो नादानं बांधलाय्‌ बंगला

अंबर नंबर बोलते शंभर नंबर तुझे लुगऱ्याला
लागलाय्‌ डांबर तुझे लुग-याला लागलाय्‌ डांबर
आवर सावर मेल्या बघतंयस कवार पोरी जेसनन गो

हायेस सुंदर पोरी जेसनन गो हायेस सुंदर
तुझे चोलीला सोन्याची जर पोरी, चाललेन्‌ गो
पहिला नंबर पोरी चाललेन्‌ गो पहिला नंबर
तुझे नादानं गो नादानं गो नादानं बांधलाय्‌ बंगला
गोमू तुझे नादानं गो नादानं गो नादानं बांधलाय्‌ बंगला

गोपाला गोपाला देवकीनंदन,Gopala Gopala Devaki

गोपाला गोपाला देवकीनंदन गोपाला
सांभाळ ही तुझी लेकरं पुण्य समजती पापाला

ही धोंड्याला म्हणती देवता, भगत धुंडती तया जोगता
स्वत:च देती त्यास योग्यता, देव म्हणूनी कुणी न भजावे
फुका शेंदरी दगडाला


कुणी न रहावे खुळे अडाणी, शिक्षण घ्यावे व्हावे ज्ञानी
ह्यासाठी ही झिजते वाणी, मी जातीचा धोबी देवा
धुवीन कपडा मळलेला

जिकडे तिकडे तूच नांदसी, अणुरेणुतून हरी विहरसी
तूच तारिसी तूच मारिसी, पोटासाठी विसरतात ही
तुला जगाच्या पापाला

हेच मागणे तुला श्रीहरी, घाम गाळी त्या मिळो भाकरी
कुठेच कोणी नको भिकारी, कुणी कुणाचा नको रिणकरी
कुणी न विटो नर जन्माला