गंजल्या ओठांस माझ्या GANJALYA OTHAS MAZYA

गंजल्या ओठांस माझ्या धार वज्राची मिळू दे !

आंधळ्या आत्म्यात माझ्या सूर्य सत्याचा जळू दे !

पांगळा बंदिस्त माझा जन्म आकाशून जावो

वादळी आवेग माझा चार भिंतींना कळू दे !

सारखे सौंदर्य माझ्या कोरड्या गात्री खळाळो

सारखे अस्तित्व माझे पेटतांना दर्वळू दे !

लाभु दे लाचार छाया मोठमोठ्यांना परंतू

तापल्या मातीत माझा घाम मानाने गळू दे !

Lyrics - सुरेश भट SURESH BHAT
Music -पं. हृदयनाथ मंगेशकर PANDIT HRUDAYNATH MANGESHAKAR
Singer - रवींद्र साठे RAVINDR SATHE
Movie / Natak / Album -उंबरठा UMBARATHA