औंदा लगीन करायचं (२),Aunda Lageen (2)

पुनव पुसाची आली आता
साल सोळावं सरायचं
कुठवर चोरून फिरायचं... औंदा लगीन करायचं !


आई कोण ? बाबा कोण ?
साक्षीदार पाहिजेत तीन
रस्त्यावरचं धरायचं;
कुठवर चोरून फिरायचं... औंदा लगीन करायचं !

सरकारात जाऊन, नावगाव लिहून
पाच रुपये तिथं भरायचं
साल सोळावं सरायचं
कुठवर चोरुन फिरायचं... औंदा लगीन करायचं !

न्हाई मांडव; नको वऱ्हाड
पहिल्या रातीत नवं बिऱ्हाड
एकमेकांमधी मुरायचं
कुठवर चोरुन फिरायचं... औंदा लगीन करायचं !

औंदा लगीन करायचं (१), Aunda Lageen (1)

दाटु लागली उरात चोळी
कुठवर आता जपायचं
औंदा लगीन करायचं
मला, औंदा लगीन करायचं


रस्त्यानं जाताना बघत्यात किती
गालातल्या गालात हसत्यात किती
पदर सारखा ढळतोय ग
किती तयाला आवरायचं

मनात ठसतोय कुणीतरी
उरात होतंय्‌ कसंतरी
झोप रातिला येइना मुळी
सपनांत कुनितरि बघायचं

धक्का मारत्यात रस्त्यामधी
खळबळ होतिया मनामधी
मनासारखा हवा गडी
कुठवर बाई थांबायचं

ओळखिले मी तुला नाथा,Olakhile Mi Tula Natha

ओळखिले मी तुला नाथा, ओळखिले मी तुला
कुरूप सावळ्या मूर्तीमधला देवपणा जाणिला

सौधावरती पडे चांदणे
अर्ध्या मिटल्या माझ्या नयने,
टिपले कण ते अधिरपणाने
सतार अंकी घेउनीया तू अनुरागची छेडिला !

कला करी तव, उदारता मनि
भीती रमली अंती पूजनी
तव सहवासी मधु दिनरजनी
काल सुगंधित, देह सुगंधित, सुगंध उरी दाटला !

तुझ्यासारखा नाथ असावा
तुझ्या छातीवर घेत विसावा
उरला-सुरला राग हसावा
ठसा मूर्तिचा तुझ्या सानसा पोटी मी गोपिला !

ओळखले मी ओळखले,Olakhale Mi Olakhale

ओळखले मी ओळखले
तुझ्या दिलवरा मनातले

तव नयनांची या नयनांनी
धरली हळवी प्रीत शिकवणी

नजरेच्या त्या मुळाक्षरांनी
कशि लाजाया नकळत शिकले
हेच नेमके असेल पुसले

शिकता शिकता डोळे खिळले
हात रेशमी गळ्यात रूळले
ओठवरती गीतही जुळले
शब्दाविण ते नव्हते कळले
तेच नेमके असेल लिहिले

ओळख पहिली गाली हसते,Olakha Pahili Gali Hasate

ओळख पहिली गाली हसते
सांग दर्पणा कशी मी दिसते

आषाढीच्या तिन्हीसांजेला
पैलतिरी त्या पाणवठ्याला
बघुनी ज्याला जीव लाजला
आठवण त्याची हृदयी ठसते

नाव जयाचे घुमता कानी
चित्र रंगते मिटल्या नयनी
बाहुपाशी जाता विरुनी
माझ्यावर मी जेव्हा रुसते

करी बांगडी राजवारखी
नथणी बुगडी तुझ्यासारखी
तुझ्यापरी तो रत्‍नपारखी
म्हणूनी तुजला घडी घडी पुसते

ओवाळिते मी लाडक्या,Ovalite Mi Ladakya

ओवाळिते मी लाडक्या भाऊराया

चंद्र हा गगनी हासतो बघुनी
चांदणे शिंपुनी करी माया

दिवाळीची शोभा या उजेडात न्हाली
कळस होऊनी भाऊबीज आली
जन्मोजन्मी मिळू दे तिची छाया

डोळे दोन ज्योती तेवती मंद मंद
ममता फुलवी जाईचा सुगंध
आतूरली पूजेला माझी काया

गुणी माझा भाऊ याला ग काय मागू

हात जोडूनिया देवाजीला सांगू
औक्ष माझं वाहू दे त्याच्या पाया

ओठांवरती रोज प्रभाती,Othanvarati Aaj Prabhati

ओठांवरती रोज प्रभाती घ्यावे मंगल नाम
रघुपति राघव राजाराम

सुरेखसे ते संगमरवरी
पंचानन ते मम देव्हारी
हनुमंतासम हात जोडुनी पूजावा घनश्याम

पंचवटीच्या पाषाणातुन
नाम ऐकु ये श्रीरघुनंदन
गोदातीरी पर्णकुटीचे ज्याचे सुंदर धाम

भूलोकी या ऋषी वाल्मिकी
राम दर्शने होइ सार्थकी
परमार्थाचा मार्ग दाविती माझे प्रभु श्रीराम