सांभाळ दौलत सांभाळ,Sambhal Dauat Sambhal

येड्या मानसा जपून चाल, देव सांगतो सांज सकाळ
सांभाळ दौलत सांभाळ अरं ही दौलत सांभाळ

ह्यो यज्ञ मांडला कर्मा संगती धर्माचा ..... ह्यो धर्माचा
ह्यो वारा गातोय मंतर हरीच्या नामाचा ..... ह्यो नामाचा
कुणी राकुस येता बाण सुटावा रामाचा ..... हो रामाचा
पाप मरावं पुण्य उरावं दुनिया ऱ्हाईल खुशाल
सांभाळ दौलत सांभाळ अरं ही दौलत सांभाळ

ह्ये माणिक मोती तालावरती डुलत्यात ..... आहा
ह्ये रान पाचूचं बघून डोळं दिपत्यात ..... आहा
ही आतुर झाली पिकं, जाऊ द्या पोटात भुकेल्या पोटात
त्यागावरती सारी जगतील अन्नब्रम्हाची कमाल
सांभाळ दौलत सांभाळ अरं ही दौलत सांभाळ

पानी सुटंल तोंडाला भूमी होईल अनावर ..... बा अनावर
ही बाग देवाची, तुडवा करतिल जनावरं ..... का जनावरं
जीव जगण्यापायी जल्म घेतो जगावर
माया द्यावी ममता घ्यावी सुखाचा होईल सुकाळ
सांभाळ दौलत सांभाळ अरं ही दौलत सांभाळ

लाजऱ्या कळीला भ्रमर,Lajarya Kalila Bhramar

लाजऱ्या कळीला भ्रमर सांगतो काही
मी लाज लाजुनी लालस झाले बाई

जे सांगू नये ते सांगितले पदराने
मी अमृत घेता तुझ्यातले अधराने
गात्रात अनामिक स्वर झंकारीत राही

तू वदलासी मज जवळ घेऊनी कानी
मी तुझाच आहे तू माझी फुलराणी
वाटते तुझ्यावीण अर्थ जीवना नाही

देते तुला हवे ते,Dete Tula Have Te

देते तुला हवे ते, देते दहा दिशा रे
नेऊ नकोस माझी ही एवढी तृषा रे

हे मेघ घेउनी जा जे कोष अमृताचे

हा मोर राहु दे तू त्यांचा परि पिसा रे
जा चंद्र घेउनी हा मज वाट दावणारा
संपेल चांदणीचा अभिसार हा कसा रे ?

घे अंग कांचनाचे, घे रंग कुंतलांचे
हृदयांत या सलू दे दु:खाचिया कुसा रे
घे एवढे सभोवती मी राहणार नाही
होईन अमर परि मी पिऊनी अशा विषा रे

ताईबाई अता होणार लगीन,Taibai Ata Honar Lagin

ताईबाई, ताईबाई ग,
अता होणार लगीन तुमचं !

नखरा बिखरा सारा विसरा
धम्मक लाडू चारील नवरा
नवरा म्हणजे बागुलबुवा
घेऊन जाईल त्याच्या गावा
तिथे सिनेमा नाटक कुठचं ?

धुणी धुवा मग झाडून काढा
रांधा, वाढा, उष्टी काढा
निवडा तांदूळ, लाटा पोळ्या,
शिवा टिपा मग सदरे, चोळ्या
करा शेवया, भरा ग लोणचं !

सासूबाई करतील वटवट
दीर, नणंदा देतील चापट
मामंजींना दमा खोकला
जा पिकदाणी त्यांची उचला
सुख सरलं हो बापाघरचं !

जुळत आली कथा,Julat Aali Katha

जुळत आली कथा, सिद्धीस जाईल का
जे हवे वाटते तेच होईल का?

मी न चुकले मुळी, बोलता वागता

हेतु होता मनी सारखा जागता
जाणुनी गूज तो जवळ घेईल का ?

चार डोळ्यांतल्या ओळखीच्या खुणा
उमगल्या ना तुला काय वेड्या मना
अर्थ मौनातला बोलीहुन बोलका

व्यर्थ शंका तुझी व्यर्थ ही भीरुता
मजसि भासे दिसे बहुदिशी चारुता
भाग्यसमयी अशा पुसशी का नेमका

गंगा आली रे अंगणी,Ganga Aali Re Angani

गंगा आली रे अंगणी

बारा महिने तेरा काळ
रानोमाळी सुगी सुकाळ
चतुरपणाने करा गड्यांनो,

चतुरपणाने करा जळाच्या पाटाची आखणी

भूमिवरच्या भागीरथीला
स्वर्गंगेचा ओघ मिळाला
ऐसे महात्म्य गंगेचे
पाणी, पाणी, जिकडे-तिकडे, सौख्याची श्रावणी

सुंबरानं मांडिलं गा बिरूबा या देवाचं
आबाळाच्या पित्याचं गा धरीतरी मातेचं

पिकून पिवळी झाली घाटं
घुमवा भलरी भल्या पहाटं
भलरी भलरी भलरी दादा भलगडी दादा
करा कापणी, काढा दौलत, साधा ही पर्वणी

यंत्र चालवा गाळा ऊस
अमाप पिकला घ्या कापूस
वेचा कापूस वेचा ग वेचा कापूस वेचा
दूध विकाया पुन्हा निघाल्या, गोकुळच्या गौळणी

युग यंत्राचे आले रे, अवघड सोपे झाले रे
घाम न आता पडो कुणाचा, कोठे निष्कारणी

दळिद्र गेले पळुनि पार

फळाफुलांना आला बहार
नांदायाते येई लक्ष्मी, स्वर्गीची पाहुणी

गंगा आली, लक्ष्मी आली अंगणी

ऊठ शंकरा सोड समाधी,Utha Shankara Sod

ऊठ शंकरा सोड समाधी
वनात आला मदन पारधी

सुरंग आला सर्व उपवना
सुगंध येतो शीतल पवना

चालुनि आली वसंतसेना
शरणागती घे युद्धाआधी

पंचशरांनी भाता भरुनी
उभा रतिपती माझ्या नयनी
पुष्पधनुष्या करि सरसावुनी
अचुक तुझ्या तो हृदया वेधी

सप्तस्वरांची झडवित नौबत
मीनांकित ध्वज मिरवित मिरवित
जवळी ये रथ, आला मन्मथ
सख्य तयाशी सविनय साधी