ही कुणी छेडिली HI KUNI CHEEDALI TAR

ही कुणी छेडिली तार
प्राजक्ताच्या मधुगंधासम कुठुनी ये केदार !

तूच छेड ती, तूच ऐक ती
आर्त सुरावट तुझ्याच हाती
स्पर्षावाचुन तूच छेडिसी माझी हृदय-सतार !

जागृत मी का आहे स्वप्‍नी ?
श्रवणि पडे पण दिसे न नयनी
स्वप्‍नातच का मजसि बोलले माझे राजकुमार ?

स्वप्‍नासम मज झाले जीवन
स्वप्‍नही नीरस सखी, तुझ्यावीण
अर्ध्या रात्री शोधीत आलो तुझे प्रियतमे, दार !

वेलीवर त्या नका, चढू नका
चढा सूर नच लवे गायका !
तूच चढविला तारस्वर हा तूच तोड ही तार !

Lyrics -ग. दि. माडगूळकर G.D.MADAGULAKAR
Music -पु. ल. देशपांडे P.L.DESHPANDE
Singer -आशा भोसले ,  पं. वसंतराव देशपांडे PANDIT VASANTRAW DESHAPANDE
Movie / Natak / Album -गुळाचा गणपती GULACHA GANAPATI 

हसले मनी चांदणे,Hasale Mani Chandane

हसले मनी चांदणे
जपुनि टाक पाउल साजणी, नादतील पैंजणे

बोचतील ग, फुलं जाइची तुझी कोमला काय
चांदण्यातही सौंदर्याने पोळतील ना पाय ?

पानांच्या जाळीत लपोनी चंद्र पाहतो गडे
सांग कुणाच्या भेटीसाठी जीव सारखा उडे

कुजबुजुनी कानात सांगतो मधुप, नको ग रुसू
लाजलाजऱ्या कळ्याफुलांना खुद्‌कन्‌ आलं हसू

हो जरा, बघा की वरी, कळू द्या तरी, उमटु द्या वाणी
का आढेवेढे उगाच, सांगा, काय लाभले राणी ?

का ग अशा पाठीस लागता मिळुनी साऱ्या जणी ?
आज लाभला मला माझिया सर्वस्वाचा धनी

किति, किति ग भाग्याची
भलतीच ओढ ही कामसुंदराची
नव्हे ग श्यामसुंदराची

शब्दावाचुन कळले सारे,Shabdavachun Kalale Sare

शब्दावाचुन कळले सारे शब्दांच्या पलिकडले
प्रथम तुला पाहियले आणिक घडू नये ते घडले

अर्थ नवा गीतास मिळाला
छंद नवा अन्‌ ताल निराळा
त्या दिवशी का प्रथमच माझे सूर सांग अवघडले ?

होय म्हणालिस नकोनकोतुन
तूच व्यक्त झालीस स्वरातुन
नसता कारण व्याकुळ होऊन उगिच हृदय धडधडले

आठवते पुनवेच्या रात्री
लक्ष दीप विरघळले गात्री
मिठीत तुझिया या विश्वाचे रहस्य मज उलगडले

मी तुमची जाहले,Mi Tumachi Jahale

या पायावर देव वाहिला, साक्षी ही पाउले
मी तुमची जाहले, जिवलगा मी तुमची जाहले !

चल ग राणी, हिरव्या रानी, गुलुगुलू गोष्टी करू
चला नदीच्या तीरी राया, वाळूवरती फिरू
मंजुळवाणे ऐकीव गाणे, मन त्याला भुलले
मी तुमची जाहले, जिवलगा मी तुमची जाहले !

चल ग राणी, रात चांदणी, चांदण्यात न्हाऊ
धारांखाली मल्हारातिल, प्रीतगीत गाऊ
धारांहुनही सूर सुखाचे तुझिया ओठातले
मी तुमची जाहले, जिवलगा मी तुमची जाहले !

माझ्या कोंबड्याची शान,Majhya Kombadyachi Shan

माझ्या कोंबड्याची शान
कोंबड्याची शान, माझ्या कोंबड्याची शान
छाती काढून चाले तुरतुरा, तुरा डोईवर छान

भल्या पहाटे उठतो आपण, उंच घुमवीतो तान
याचे गाणे ऐकून येते, निजल्या जगता भान

पिळली जाई तोवर राही, ताठच याची मान
घरी नांदता कुटुंब याचे, अन्नाची ना वाण
संतानावर याच्या जगते, देशाचे संतान

माझं ठरल्यालं लगीन,Majha Tharalyala Lageen

कुणासाठी सखे तू घरदार सोडलं ग
माझं ठरल्यालं लगीन मोडलं ग

बाळपणापासून तुमचा आमचा मैतरपणा
संगतीनं सूर पारंबी खेळलो, केला लई हूडपना
वय वाढता, वाढता, वाढता, पटल्या पिरतीच्या खुणा
अन्‌ आज कसं येड्यावाणी, जाणंयेणं सोडलं ग

आंबेराईतल्या शंभूमहादेवाच्या देवळात
तुमचे आमचे काय काय बोलणे झालं होतं
दिला बोल, इसरला हातोहात, हातोहात
अन्‌ आज कसं भलत्याशी नातं तुम्ही जोडलं

तुम्ही पाच पंच न्याय करा, चावडी म्होरं
इश्वासघाताची फिर्याद करतो मी सादर
हिनं माजं पार डुबिवलं घरदार, घरदार
हिनं चालत्या गाडीचं चाक की हो काढलं

माझे जीवन गाणे,Majhe Jeevan Gane

माझे जीवन गाणे, माझे जीवन गाणे !

व्यथा असो आनंद असू दे
प्रकाश किंवा तिमीर असू दे
वाट दिसो अथवा न दिसू दे, गात पुढे मज जाणे !

कधी ऐकतो गीत झऱ्यातुन
वंशवनाच्या कधी मनातुन
कधि वाऱ्यातुन, कधि ताऱ्यांतुन झुळझुळतात तराणे !

तो लीलाघन सत्य चिरंतन
फुलापरी उमले गीतातुन
स्वरास्वरातुन आनंदाचे नित्य नवे नजराणे !

गा विहगांनो माझ्यासंगे
सुरांवरी हा जीव तरंगे
तुमच्यापरि माझ्याहि स्वरांतुन उसळे प्रेम दिवाणे !

माझिया माहेरा जा,Majhiya Mahera Ja

माझिया माहेरा जा, रे पाखरा
माझिया माहेरा जा

देते तुझ्या सोबतीला आतुरले माझे मन
वाट दाखवाया नीट माझी वेडी आठवण
मायेची माउली, सांजेची साउली
माझा ग भाईराजा

माझ्या रे भावाची उंच हवेली
वहिनी माझी नवी-नवेली
भोळ्या रे सांबाची, भोळी गिरिजा

अंगणात पारिजात, तिथे घ्या हो, घ्या विसावा
दरवळे बाई गंध, चोहीकडे गावोगावा
हळूच उतरा खाली, फुलं नाजुक मोलाची
माझ्या मायमाऊलीच्या, काळजाच्या की तोलाची
'तूझी ग साळुंकी, आहे बाई सुखी'
सांगा पाखरांनो, तिचिये कानी
एवढा निरोप माझा

नाच रे मोरा अंब्याच्या,Nach Re Mora Ambyachya

नाच रे मोरा, अंब्याच्या बनात
नाच रे मोरा नाच !

ढगांशि वारा झुंजला रे
काळा काळा कापूस पिंजला रे
आता तुझी पाळी, वीज देते टाळी
फुलव पिसारा नाच !

झरझर धार झरली रे
झाडांचि भिजली इरली रे
पावसात न्हाऊ, काहितरि गाऊ
करुन पुकारा नाच !

थेंबथेंब तळ्यात नाचती रे
टपटप पानांत वाजती रे
पावसाच्या रेघांत, खेळ खेळु दोघांत
निळ्या सौंगड्या नाच !

पावसाचि रिमझिम थांबली रे

तुझि माझि जोडी जमली रे
आभाळात छान छान, सात रंगी कमान
कमानीखाली त्या नाच !

दूर दूर चांदण्यात मी,Dur Dur Chandanyat Mi

दूर दूर चांदण्यात मी असाच हिंडतो !
तारकांस हालचाल मी तुझी विचारतो !

वाटते कधी चुकून

भेटशील तू अजून
थांबतो पुन्हा मधून
अन्‌ उगीच सावल्यात सैरभर पाहतो !

चाललो असेच गात

ऐकते उदास रात
चंद्रमा झुरे नभात
अन्‌ इथे फुलाफुलात मी तुलाच शोधतो !

वेड लागले जिवास

हे तुझे दिशात भास
हा तुझा मनी सुवास
आपल्याच आसवांत मी वसंत ढाळतो !

दूर कुठे राउळात दरवळतो,Dur Kuthe Raulat Darvalato

दूर कुठे राउळात दरवळतो पूरिया !
सांजसमयी दुखवितात अंतरास सूर या !

असह्य एकलेपणा, आस आसवी मिळे
काय अंतरात ते अजून ना कुणा कळे
झाकळून जाय गाव, ये तमास पूर या !

दूर वास रे तुझा, ध्यास लागला मनी
दृष्टिभेटही नसे, काय सांगणे जनी
एकवार तूच ये सखीस धीर द्यावया !

सलत सूर सनईचा वारियात कापरा
सुकून पाकळी मिटे, मूक भाव लाजरा
फुलात गंध कोंदला, वाट ना उरे तया !

तुझ्या मनात कुणितरी लपलं,Tujhya Manat Kunitari Lapala

तुझ्या मनात कुणितरी लपलं ग
किती जरी आजवर जपलं ग

कधी न दिला डोळ्याला डोळा
स्वभाव अगदी साधा भोळा
कसा सुचावा भलता चाळा
परि दैव खुदुखुदु हसलं ग

कसा धरावा सखे भरवसा
पळे न कुठवर बाई ग ससा
प्रीत पारधी येईल सहसा
कसं अचुक सावज फसलं ग

मदन दूत पिटतील डांगोरा
मनोगते ही सांगती चोरा
मनमोरा नाचसी माजोरा
कुणी नव्हेच बाई अपलं ग

तेच नाव ओठांवर यावे
तेच बोल कानात घुमावे
तेच रूप नयनांत भरावे
ते गुपित आम्हाला कळलं ग

झाली पहाट झाली पहाट,Jhali Pahat Jhali Pahat

झाली पहाट, झाली पहाट

विरे काळोखाचा वेढा, चांद वळला वाकडा
वाजे राउळी चौघडा, डुले दारीचा केवडा
भवती जंगल दाट

साद घालितो कोंबडा, उठा नयन उघडा
पहा उजळल्या कडा, पडे प्राजक्ताचा सडा
खचली पाऊलवाट

घरघर घरोघरी, सूरमंजूळ लहरी
तरंगत वाऱ्यावरी, जाती पहिल्या प्रहरी
गाती सृष्टीचे भाट

जाता गुंजती गौळणी, मंद पैंजण पावली
कटि कुंभ आंदोलती, गानी गुंग भृंगावली
बोले पाणियाचा घाट

झोपडीत मायलेकी, दळताती सासूसूना
तुझे पाऊल पडू दे, अंगणात नारायणा
उजळीत पुढली वाट

जा मुलि शकुंतले सासरी,Ja Muli Shakuntale Sasari

जा मुलि शकुंतले, सासरी
आवरी डोळ्यांमधल्या सरी !

वडील मंडळी असतिल कोणी
वागच त्यांच्या अर्ध्या वचनी
सवतीलागी मानुनी बहिणी
राहि सदा हासरी !

पतिसेवा हे ब्रीद आपुले
देवाहुन ती थोर पाउले

रागावून ते जरी बोलले
बोलु नको त्यावरी !

दोन्ही कुळांचे नाव वाढवी
पतिव्रतेची पदवी मिळवी
संसारी तुज वाण नसावी
लक्ष्मी तू साजिरी !

श्रीहरी विदुराघरि पाहुणा ShriHari Vidura Ghari

सुवर्णद्वारावतीचा राणा


श्रीहरी विदुराघरि पाहुणा !


मिष्टान्ने कोठुन ? आणिला कणिकोंडा रांधुन


सांगे आवर्जुन, भाबडी विदुराची सुगरण


वानी रुचकरपणा


श्रीहरी विदुराघरी पाहुणा !




कवळ मुखी नेतसे, मागुनी पुन्हा पुन्हा घेतसे


तृप्त मनी होतसे, तृप्तिची ढेकर वर देतसे


विसरे जलपाना


श्रीहरी विदुराघरी पाहुणा !




प्रेमळपण आगळे, चाटितो उरलीसुरली दळे


योग्यांना ना मिळे, मूर्त ते परब्रम्ह सावळे !


काय लाडकेपणा


श्रीहरी विदुराघरी पाहुणा !

केतकीच्या बनात,Ketakichya Banat

केतकीच्या बनात
उतरत्या उन्हात
सळसळ पानात-
जपून जा !

जपून जा गडे जपून जा-

कुठे निघेल नाग !

पायवाट लपेल
काटाकुटा रुपेल
तळव्यात खुपेल-
जपून जा !

ढग येता दाटून
मग वाट कोठून
पाय ठेवू रेटून-
जपून जा !

जपून जा गडे जपून जा-
कुठे निघेल नाग !

उसळत्या वयात
बळ तुझ्या पायात
चाल ठेव कह्यात
जपून जा !

फसू नको मोहात

जरा उभी रहात
मागेपुढे पहात
जपून जा !

जपून जा गडे जपून जा-
कुठे निघेल नाग !


वादळाच्या वाऱ्यात
नको चालू तोऱ्यात
पडशील भवऱ्यांत
जपून जा !

जाऊ नको गुंगत
स्वप्नात रंगत
तुझी तुला संगत
जपून जा !

जपून जा गडे जपून जा-
कुठे निघेल नाग !

कुणी म्हणेल वेडा तुला,Kuni Mhanel Veda Tula

कुणी म्हणेल वेडा तुला
कुणी म्हणेल वेडी मला
या वेडाची गोडी ठाऊक
तुझी तुला अन्‌ माझी मला !


हे वेड जगावेगळे
ते जगास कुठुनी कळे?
जगावेगळा छंद लागला
तुझा मला अन्‌ माझा तुला !


मज येईना बोलता
तुज साधेना सांगता
मुक्यासारखे बघती डोळे
तुझे मला अन्‌ माझे तुला !

हे दोन जीवांचे कोडे
ते ज्याच्या त्या उलगडे
त्या कोड्याची फोड माहिती
तुझी तुला अन्‌ माझी मला !

करु देत शृंगार,Karu Det Shringar

करु देत शृंगार, सख्यांनो करु देत शृंगार
अग्निवाचून आज करितसे राजपुती जोहार

जीवंत पति, मी सती जातसे
भाग्य लाभले कुणा कधी असे
मृदुल मृदुल तर या कमलाचा यज्ञी स्वाहाकर

ही भाग्याची वेळ साजणी
भांग भरा ग गुंफा वेणी
राजपुतीच्या नयनी का कधि दिसते अश्रूधार

मला न माहित कोण यवन तो
कोण जाणिते मृत्यु काय तो
हासत हासत मिठी मरणाला हा अमुचा संसार

कबिराचे विणतो शेले,Kabirache Vinato Shele

कबिराचे विणतो शेले, कौसल्येचा राम
भाबड्या या भक्तासाठी, देव करी काम !

एक एकतारी हाती, भक्त गाई गीत
एक एक धागा जोडी, जानकिचा नाथ
राजा घनःश्याम !

दास रामनामी रंगे, राम होइ दास
एक एक धागा गुंते, रूप ये पटास
राजा घनःश्याम !

विणुन सर्व झाला शेला, पूर्ण होइ काम
ठायि ठायि शेल्यावरती, दिसे रामनाम
गुप्त होई राम !

हळु हळु उघडी डोळे, पाहि जो कबीर
विणूनिया शेला गेला, सखा रघुवीर
कुठे म्हणे राम ?

इंद्रायणी काठी ,Indrayani Kathi

इंद्रायणी काठी, देवाची आळंदी

लागली समाधी, ज्ञानेशाची



ज्ञानियाचा राजा भोगतो राणिव

नाचती वैष्णव, मागेपुढे




मागेपुढे दाटे ज्ञानाचा उजेड

अंगणात झाड कैवल्याचे



उजेडी राहिले उजेड होऊन

निवृत्ती, सोपान, मुक्ताबाई