प्रेम केले काय हा,Prem Kele Kaay Ha

प्रेम केले, काय हा झाला गुन्हा ?
अंतरीची भावना सांगू कुणा ?

भोगिली शिक्षा पुरी मी प्रीतिची
साहवेना ती सुखाची वेदना

साक्ष द्याया बोलके झाले मुके
जीभ चावूनी टळे का वंचना

रंगवीतो चित्रलेखा प्रेमला
अनिरुद्ध स्वप्नी ये उषेच्या मीलना

बोलुनी केलीस ही जाहीर चोरी
हसशी का, रे गुन्हेगारा, पुन्हा

कोणा कशी कळावी,Kona Kashi Kalavi

कोणा कशी कळावी, वेडात काय गोडी !
ती प्रेममूढतेची, सुटती न गूढ कोडी !

सोडून नावगावा
शोधावया विसावा
तुडवीत कंटकांची, ती वाट नागमोडी !

लहरीवरी फिरावे
जळि घेत हेलकावे
जाणोनि लोटिली मी, या वादळात होडी !

दिसती अजाण भोळे
परि हे फितूर डोळे
माझ्या मनोगताची, करितील ग चहाडी !

हसले कुणी हसू दे
रुसले कुणी रुसू दे
राही कबूतरांची दारा-घरात जोडी !

अजुनी रुसून आहे, Ajuni Rusun Aahe

अजुनी रुसून आहे, खुलता कळी खुले ना
मिटले तसेच ओठ, की पाकळी हले ना !

समजूत मी करावी, म्हणुनीच तू रुसावे
मी हास सांगताच, रडताहि तू हसावे
ते आज का नसावे, समजावणी पटे ना

धरिला असा अबोला, की बोल बोलवेना !

का भावली मिठाची, अश्रूंत होत आहे
विरणार सागरी ह्या जाणून दूर राहे ?
चाले अटीतटीने, सुटता अढी सुटेना
मिटवील अंतराला, ऐसी मिठि जुटे ना !

की गूढ काहि डाव, वरचा न हा तरंग
घेण्यास खोल ठाव, बघण्यास अंतरंग ?
रुसवा असा कसा हा, ज्या आपले कळेना ?
अजुनी रुसून आहे, खुलता कळी खुले ना !

आज अचानक गाठ पडे, Aaj Achanak Gatha Pade

आज अचानक गाठ पडे

भलत्या वेळी भलत्या मेळी
असता मन भलतीचकडे

नयन वळविता सहज कुठेतरि
एकाएकी तूच पुढे

नसता मनिमानसी अशी ही
अवचित दृष्टिस दृष्ट भिडे

दचकुनि जागत जीव नीजेतच
क्षणभर अंतरपट उघडे

गूढ खूण तव कळुन नाकळुन
भांबावुन मागे मुरडे

निसटुनि जाई संधीचा क्षण
सदा असा संकोच नडे