मी लता तू कल्पतरू,Mi Lata Tu Kalpataru

मी लता, तू कल्पतरू
संसार अपुला सुखी करू

सोन्याचा हा असे उंबरा
भाग्यवती मी तुझी इंदिरा
आले नाथा तुझ्या मंदिरा
अमृतघट ते इथे भरू

सुवासिनीचे कुंकू ल्याले
भाग्यवती मी आज जाहले
शतजन्माचे सार्थक झाले
वेल प्रीतीची ती बहरू

स्वप्न उद्याचे आज पाहते
बाळ लोचनी या दुडदुडते
वात्सल्याचे येते भरते
या आनंदा कशी आवरू ?

चरण पूजिते पतिदेवाचे
मरणहि येवो सौभाग्याचे
हेच मागणे भाग्यवतीचे
कधी न आपण जगी अंतरू