राम चालले, तो तर सत्पथ
थांब सुमंता, थांबवि रे रथ
थांबा रामा, थांब जानकी
चरणधूळ द्या धरूं मस्तकीं
काय घडे हें आज अकल्पित !
रामराज्य या पुरीं यायचें
स्वप्न लोचनीं अजुन कालचें
अवचित झाले भग्न मनोरथ
गगननील हे, उषःप्रभा ही
श्रीरघुनंदन, सीतामाई
चवदा वर्षें का अस्तंगत ?
चवदा वर्षें छत्र लोपतां
चवदा वर्षें रात्रच आतां
उरेल नगरी का ही मूर्च्छित ?
कुठें लपे ती दुष्ट कैकयी ?
पहा म्हणावें हीन दशा ही
अनर्थ नच हा, तुझेंच चेष्टित
करि भरतातें नृप मातोश्री
रामा मागें निघे जयश्री
आज अयोध्या प्रथम पराजित
पिताहि मूर्च्छित, मूर्च्छित माता
सोडुन रामा, कोठें जातां ?
सवें न्या तरी नगर निराश्रित
ये अश्रूंचा पट डोळ्यांवर
कोठें रथ तो ? कोठें रघुवर
गळ्यांत रुतली वाणी कंपित
No comments:
Post a Comment