तू अनश्वरातील अमरेश्वर,Tu Anashwarateel

तू अनश्वरातील अमरेश्वर अविनाशी
मज देशील का तू दर्शन दिव्य प्रकाशी

तू चिरंतनातील ईश्वर असशिल का रे
हे दोन घडीचे वैभव नश्वर सारे
बरसती तुझ्यावर नक्षत्रांच्या राशी

गाईली किती मी तव करुणामय गाणी
दाटला गळा मग नयनी उरले पाणी
तू मंगल प्रतिभा ब्रम्ह:तेज आकाशी

का तुला न यावी करुणा माझी देवा
तू केवळ माझ्या सर्वस्वाचा ठेवा
दे मला आसरा तुझिया चरणापाशी

कुंजात विहरतो सुगंध शिंपित,Kunjat Viharato Sugandha

कुंजात विहरतो सुगंध शिंपित वारा
दे प्रिया मला तू तुझ्या मिठीत निवारा !

हृदयात छेडती कोमल सूर सतारी
उमटले अनामिक स्वप्न मनाच्या दारी
मज आशय कळला तुझ्या प्रितीचा सारा
दे प्रिया मला तू तुझ्या मिठीत निवारा !

रंगात अबोली थरारता ओठात
राहु दे सुरंगी पाचुपंख बोटात
बिलगली पाखरे कळ्यांस देत इशारा
दे प्रिया मला तू तुझ्या मिठीत निवारा !

बहरात फुलांच्या कमान झुकली खाली
अंगात उमलुनी तिथे पौर्णिमा आली
बरसल्या अंतरी इथे सुखाच्या धारा
दे प्रिया मला तू तुझ्या मिठीत निवारा !