झुंजुमुंजु झालं चकाकलं,JhunjuMunju Jhala

झुंजुमुंजु झालं, चकाकलं सम्दं रान
पगुन्‌ श्यान्‌ सोन्यावानी हरपतंया भान

घरट्यात चिवचिव करीती पाखरं
गव्हानीत चुळूबूळू करीती वासरं

आळुखपिळुख आता कशाचं ग रानी
उपसाया होवं आधी मोटंचं पानी

सुनं खळं बैलाविना चाऱ्याविना बैल
जशी ऱ्हाती रायाविना घरात बाईल

शिळंपाकं काहीतरी आन रातचं ग
न्याहारिला बिगीबिगी बसू संगसंग

नग झाकु पदरात कन्साचं दानं
नग दावु लई भाव घेईन हातानं

पिरतीचं पीक लई येई माळावर
राबुनशान खाऊ संगं सकाळ दुपार

चढू डोंगरांची माथी तुडवू ओहोळ
हातामंदी घालून हात फिरू रानोमाळ