गणराज रंगी नाचतो,Ganaraj Rangi Nachato

गणराज रंगी नाचतो, नाचतो,
पायि घागऱ्या करिती रुणुझुणु
नाद स्वर्गि पोचतो !

कटि पीतांबर कसुन भर्जरी
बाल गजानन नर्तनास करि
तुंदिल तनु तरि चपल साजिरी
लावण्ये साजतो !

नारद तुंबरु करिती गायन
करी शारदा वीणावादन
ब्रम्हा धरितो तालहि रंगुन
मृदंग धिमि वाजतो !

देवसभा घनदाट बैसली
नृत्यगायने मने हर्षली
गौरीसंगे स्वये सदाशिव
शिशुकौतुक पाहतो !