तू तलम अग्‍नीची पात TU TALAM AGNICHI PAT

तू तलम अग्‍नीची पात.. जशी दिनरात जळावी मंद
तू बंधमुक्‍त स्वच्छंद, जसा रानात झरा बेबंद
तू तलम अग्‍नीची पात..

लडिवाळ बटा, गुलजार छटा तू मृदुमायेचा हात
तो तंग चंद्र अन्‌ हले पालवी शीतळ संथ जळात
ही मखमालीची शेज सखे अन्‌ जळते दाहक अंग
ही रात चांदणी कोरत जाते पाण्यामधले रंग
तू तलम अग्‍नीची पात..

तू अल्लड नवथर, थरथर देही जसे थरथरे पाणी
त्या पाण्यावरला तरंग मी अन्‌ भास वेगळा राणी
रानात बहर, अंगात बहरले धुंदफुंदले श्वास
मीलनी मग्‍न ते सर्प जसे की टाकतात नि:श्वास
तू तलम अग्‍नीची पात..

या अवघड वेळी नकोच बोलू तव ओठांची भाषा
या रानालाही कळते अपुल्या डोळ्यांमधली भाषा
असे असावे जीवन आणि असे जुळावे नाते
ही रात असावी गात स्वरांनी तुझे नि माझे गाणे
तू तलम अग्‍नीची पात..


Lyrics -मल्लिका अमर शेख MALLIKA AMAR SHAIKH
Music -आनंद मोडक ANANAD MODAK
Singer -प्रभंजन मराठे PRAMBHAJAN MARATHE
Movie / Natak / Album -मुक्ता MUKTA