ऊठ जानकी मंगल घटिका,Utha Janaki Mangal Ghatika

ऊठ जानकी, मंगल घटिका आली आनंदाची
सरली आता चौदा वर्षे अपुल्या वनवासाची

सरले आता इथे राहणे रानि-वनी अंधारी
तातांच्या वचनांची पूर्ती झाली आज अखेरी
ऊठ जानकी, मंगल घटिका आली आनंदाची


पर्णकूटिका सोडायाची वेळ आजला आली
पुन्हा जायचे आपण अपुल्या महालि वैभवशाली
वल्कल सोडुन राजवस्त्र ही फिरुनि तुज ल्यायाची

राजधानिला जायाचे चल फिरुनी आता त्वरे
दुरुनी दिसतिल चमचमणारी शिखरे अन्‌ मंदिरे
क्षणात होशिल फिरुनी आता राणी तू राजाची