राजाच्या रंगम्हाली,Rajachya Rangmhali

राजाच्या रंगम्हाली, सोन्याचा बाई पलंग
रूप्याचा खांब त्येला, मोत्याची झालर
राजाच्या रंगम्हाली, पराची मऊ गादी
जरीचा चांदवा, रेशमी शिणगार
गडनी, सजनी, गडनी सजनी ग

राजाच्या रंगम्हाली, रानी ती रुसली
बोलं ना, हसं ना, उदास नजर
राजाच्या रंगम्हाली, राजानं पुशिलं
डोळ्याची कमळं उघडा, व्हटांची डाळिंबं
गडनी, सजनी, गडनी सजनी ग

राजाच्या रंगम्हाली, रानी वो सांगिते
सुना सोन्याईन म्हाल, कशाला बडीवार
मायेच्या पूतापायी, रानी ग रडीते
आसवांची गंगा व्हाते, भिजीला पदोर
गडनी, सजनी, गडनी सजनी ग